اسلام آباد (پاکستان پوائنٹ نیوز28دسمبر 2018ء) سارےملک وچوں رجسٹرڈ افغان مہاجراں دی وطن واپسی دا عمل سردی دے موسم پاروں 28فروری تئیں موخر کرڈتا گئے ۔ جاری سال 14ہزار رجسٹرڈ افغان مہاجر وطن واپس گئے ۔یو این ایچ سی آردے نمائندے قیصر آفریدی اے پی پی نال جمعہ کو ں گالھ بات کریندے ہوئیں آکھیے جوسارے ملک وچوں رجسٹرڈ افغان مہاجراں دی واپسی دا عمل ٹھڈھ پاروں پہلی دسمبر سے 28فروری 2019ءتئیں موخر راہسی۔
جاری سال ملک وچوں 14 ہزار رجسٹرڈ افغان مہاجرپشاور اتے کوئٹہ اچ یو این ایچ سی آر دے دفتر اں دے ذریعہ وطن واپس گئے ہن۔ واپس ونجنڑ آلے رجسٹرڈ افغان مہاجراں کوں 200 ڈالر فی بندہ واپسی دے موقع تے یو این ایچ سی آر دے دفتر اچ ڈتے گن ۔انہاں ڈسایا جو وطن واپس ونجنڑ آلے رجسٹرڈ افغان مہاجر28 فروری دے بعد یو این ایچ سی آر دے متعلقہ دفتراں نال رابطہ کرتے واپسی دی تریخ گھنسن۔
