لاہور (پاکستان پوائنٹ نیوز18دسمبر 2018ء) پاکستان جاری مالی سال2018-19دے پہلے پنج مہیناں جولائی توں نومبر تئیں 6.5ارب ڈالر دی پٹرولیم مصنوعات درآمد کیتیاں جیرھی جو گزریل مالی سال دوران5.6ارب ڈالر ہن۔شماریاتی بیورو پاکستان توں جاری کیتے گئے اعدادو شمار مطابق جاری مالی سال دے پہلے پنج مہینے دوران پاکستان دے تیل دے درآمدی بل اچ 17.63فیصد ودھارا تھیا ،جیندی وجہ نال ملک دی بئی درآمدات تے وی دباﺅ ودھ گئے۔
شماریاتی بیورو پاکستان دے ڈیٹا مطابق ہک سال اچ تیل دی مصنوعات دی درآمد اچ 900ملین ڈالر دا ودھارا تھیا جڈاں جو تیل دی درآمدات اچ ودھارے پاروں ملک دی مجموعی درآمدات جاری مالی سال دے صرف پنج مہینا ں اچ23.6ارب ڈالر تئیں پج گی ہن۔بیورو پورٹ اچ آکھیا گئے جو درآمدی بل اچ ایں ودھارے دے نتیجے اچ کرنٹ اکاﺅنٹ خسارے دا حجم وی ودھے جیرھا جو ایں ویلھا حکومت سانگے سبھ توں وڈا چیلنج بنڑیا ہوئے۔
پی بی ایس ڈیٹا مطابق پٹرولیم مصنوعات دی درآمدات نومبر اچ20.86فیصد ودھارے دے نال1.36ارب ڈالر رہیاں جیرھاں جو گزریل مالی سال دے ایں دورانیہ اچ 1.12ارب ڈالر ہن ، حکومت2.9ارب ڈالر دی پٹرولیم مصنوعات درآمد کیتیاں جڈاں جوخام پٹرولیم تے2.1ارب ڈالر خرچ کیتے۔ ایل این جی دی درآمد تے1.5ارب ڈالر اتے86ملین ڈالر دی ایل پی جی وی درآمد کیتی۔بیورو رپورٹ مطابق پٹرولیم مصنوعات دی وجہ نال سارے شعبیں اچ امپورٹس ٹیبل تے منفی گروتھ نظر دی پی ہے۔
