راولپنڈی (پاکستان پوائنٹ نیوز17دسمبر 2018ء) چیف آف آرمی سٹاف جنرل قمر جاوید باجوہ مصر دے وزیر دفاع و عسکری پیداوار اتے مسلح افواج دے کمانڈر انچیف جنرل محمد ذکی اتے مسلح افواج دے چیف آف سٹاف لیفٹیننٹ محمد فرید نال ملاقاتاں کیتیاں ، آرمی چیف مصر دے سرکاری دورے تے ہن ۔سنوار کوں آئی ایس پی آر ولوں جاری بیان دے مطابق انہاں ملاقاتاں اچ سانجھی دلچسپی دے امور ، عسکری سطح تے تعلقات ، دفاعی اتے سکیورٹی تعاون تے گال مہاڑ تھی ۔
مصری قیادت انسداد دہشت گردی اچ پاک فوج دی پیشہ وارانہ مہارت اتے پاکستانی قوم دے عزم دی تعریف کیتی ۔ڈوہیں پاسوںسانجھے منصوبیں ،دفاعی پیداوار، تربیت اتے انٹیلی جنس سودھے کئی شعبیاں اچ ڈو پاسے گانڈھا ودھاونڑ تے اتفاق کیتے۔ علاقائی امن و سلامتی کیتے تعاون بہتر بنڑاونڑ تے اتفاق تھے۔ چیف آف آرمی سٹاف الازہردے امام اعظم شیخ احمد الطیب نال وی ملاقات کیتی ۔
امام اعظم ملک توں دہشت گردی دے خاتمے سانگے پاک فوج دیاں کوششاں دی تعریف کیتی ۔انہاں پاکستان دے سارے مکاتب فکر دے مذہبی سکالرز ولوں انتہا پسندی نال پیدا تھیونڑ آلے مسلیں بارے ”پیغام پاکستان“ فتویٰ دے جاری تھیونڑ دی تعریف کیتی ۔انہاں آکھیا اسلام ہک اعتدال پسند مذہب اتے مکمل ضابطہ حیات اے جیکوں عالمی برادری اچ دہشت گردی، انتہاپسندی نال نئی رلاونڑاں چاہیدا ۔ آرمی چیف مسلم نینگراں کوں روشن خیالی ، تکنیکی ترقی، اعتدال پسندی اتے ہک بئے نال پیار محبت ڈوں ودھنڑ تے زور ڈتا ۔ایندے توں پہلے آمد تے مصری فوج دے چاق و چوبند دستے چیف آف آرمی سٹاف جنرل قمر جاوید کوں وزارت دفاع اچ گارڈ آف آنر ڈتا۔
