اسلام آباد (پاکستان پوائنٹ نیوز 04 دسمبر 2018ء) وفاقی وزیر خزانہ اسد عمر آکھیے جو ملک اچ کوئی معاشی بحران کائنی ہے،ایں حوالے نال ہیجانی کیفیت پیدا کرنڑ ٹھیک کائنی ، ملک اچ وختی بھاری سرمایہ کاری آوسی، برآمدات ودھایں پن جڈاں جو خسارے اچ گھٹکی آندی پی ہے، بنیادی مسلیں دے حل سانگے وی اقدامات کیتے ویندے پن۔ وزیر خزانہ منگل کوں اتھاں 11ویںجنوبی ایشیائی اقتصادی سمٹ دی افتتاحی تقریب نال خطاب کر یندے پئے ہن۔
چار ڈینھاں دی کانفرنس دا اہتمام پالیسی ادارہ برائے پائیدار ترقی (ایس ڈی پی آئی) کیتے۔ ایں موقع تے سابق نگران وزیر خزانہ ڈاکٹر شمشاد اختر وی خطاب کیتا۔ وفاقی وزیر ملک دی معاشی صورتحال اتے ایندے اچ بہتری سانگے حکومت ولوں کیتے گئے اقدامات کوں اجاگر کریندے ہوئیں آکھیا جو ملکی اقتصادی اشارے چنگائی آلے پاسے ویندے پن ۔ انہاں آکھیا جو ایکسچینج ریٹ دا فیصلہ سٹیٹ بینک دااختیار ہے اتے بینک ایں حوالے نال فیصلہ کرنڑ دا اختیار برقرار رکھیسی ،البتہ ضرورت پئی تاں اسٹیٹ بینک داطریقہ کار مضبوط کیتا ویسی۔
انہاں آکھیا جو پی ٹی آئی دی پالیسی اچ کوئی تبدیلی نی آئی ، اسٹیٹ بینک دی غیر جانبدار اتے خود مختار ادارے دی حیثیت برقرار راہسی۔ مرکزی بینک دی خودمختاری تے کوئی سمجھوتہ نی کیتا ویندا پیا، گورنر اسٹیٹ بینک نال رابطہ رہیا تاں جو ایںحوالے نال مکینزم کوں ٹھیک بناونڑ دی ضرورت ہے۔ انہاں آکھیا جو سٹیٹ بینک اتے وزارت خزانہ وچال رابطے دا میکنزم بنڑایا ویندا پئے۔
وزیر خزانہ دا آکھنڑ ہا جو ملکی برآمدات ودھیاں پن اتے خسارے گھٹدے پن ، اتھاں کہیں قسم دی ہیجانی کیفیت کائنی ہے، ملک اچ جلد بھاری سرمایہ کاری آوسی، معیشت دے سارے اشارے چناگئی آلے پاسے ویندے پن اتے معاشی صورتحال توں متعلق غلط فہمیاں کھنڈاونڑ توں گریز کیتا نجنڑ چاہیدے۔ وزیر خزانہ اسد عمر آکھیے جو کرتار پور بارڈر کوں کھولنڑ بہوں چنگا اقدام ہا، ایندے تے پاکستان بھارت توں مثبت جواب دی امید رکھیندے، ڈوہائیں ملکاں وچال کشیدگی اتے سیاسی جھیڑے مکاونڑ سانگے انج سوچنڑاں پوسی ۔
اسد عمر آکھیا جو امید ہے جو سارک دی سطح تے تعاون مستقبل اچ جنوبی ایشیا دے خطہ کوں مستحکم کریسی۔کانفرنس اچ بھارت دا شریک نہ کرنڑ افسوس ناک ہے، ڈوہائیں ملکاں کوں مسائل دا آو¿ٹ آف باکس حل سوچنڑ پوسی۔ انہاں علاقائی تجارت کوں ودھاونڑ دی ضرورت تے زور ڈیندے ہوئیں آکھیا جو ایندی مدد نال اساں اپنڑیں عوام دیاں ضرورتاں کوں پورا کر تے غربت اچ گھٹکی کر سگدوں۔
وزیر خزانہ آکھیاجو جنوبی ایشیاءاچ انرجی لنک تے کم تھیونڑ چاہیدے، ایں مقصد سانگے پالیسی ماہرین دیاںتجویزاں آونڑ چاہیدیاں ہن اتے ایجھی کانفرنساں ایں سلسلے اچ کار آمد ثابت تھی سگدیاں ہن۔ ایں موقع تے سابق نگران وزیر خزانہ ڈاکٹر شمشاد اختر آکھیا جو موجودہ حالات دے تناظر اچ ایں کانفرنس دا انعقاد بر وقت ہے جیندی مدد نال اگی تے راہواں کڈھیاں ونج سگدیاں ہن۔ تقریب نال ایمبیسیڈر شفقت کاکاخیل، ایگزیکٹو ڈائریکٹر ایس ڈی پی آئی عابد سلہری، یو این ای ایس سی اے پی، بھارت توںڈاکٹر نگیش کمار اتے ڈبلیو ٹی او دے نمائندے رتناکر ادہیکری وی خطاب کیتا۔
