اسلام آباد (پاکستان پوائنٹ نیوز 04 دسمبر 2018ء) وزیر اعظم عمران خان وفاقی وزیر ریلوے شیخ رشید احمد کوں راولپنڈی اچ نالہ لئی ایکسپریس وے اینڈ فلڈ چینل پراجیکٹ دا فوکل پرسن مقرر کرڈتا۔وزیر اعظم آفس ولوں جاری نوٹیفیکیشن مطابق وفاقی وزیر ریلوے دی زیر نگرانی منصوبے دی فزیبلٹی تیار کیتی ویسی۔ قابل عمل پاتے ونجنڑ دی صورت اچ وزارت منصوبہ بندی ترقی تے اصلاحات اتے پنجاب حکومت سمیت سارے متعلقہ فریقاں دی مشاورت نال ایندے تے پیش رفت کیتی ونج سگسی۔
یاد رہے جو نالہ لئی ایکسپریس وے منصوبہ 2007ءاچ شروع کیتا گیا ہا جیندے تے پیش رفت دے بعد آونڑ آلیاں حکومتاں روک ڈتی ہائی ۔ ایں منصوبے دی ابتدائی لاگت 18 ارب روپے ہائی جیندے تحت نالہ لئی دے ڈوہائیں پاسے سگنل فری سڑکاں بنڑائیاں ویسن ۔ ایندے نال راولپنڈی اتے اسلام آباد وچال ٹریفک دے مسئلے حل کرنڑ اچ مدد ملسی اتے نالہ لئی دی وجہ نال راولپنڈی اچ آونڑ آلے سیلاب کوں روکیا ویسی۔
