اسلام آباد (پاکستان پوائنٹ نیوز 30 نومبر 2018ء) سابق صدر آصف علی زرداری پیپلز پارٹی دے51 ویں یوم تاسیس دے موقع تے اپنڑے پیغام اچ آکھیے جو اج وی پاکستان پیپلز پارٹی اپنڑے نظریے تے ثابت قدم کھڑی ہے، استحصالی طاقتاں دی چھیکڑی ہار تئیں جدوجہد جاری راہسی۔ انہاں آکھیے جوپاکستان پیپلز پارٹی دے ہک ہک قائد اتے کارکن سانگے شہید بھٹو اتے محترمہ بینظیر بھٹو شہید دا فلفسہ مشعل راہ ہے۔
پیپلزپارٹی پارلیمنٹ دی بالادستی تے کوئی سمجھوتہ کائناں کریسی۔ اساں پارلیمنٹ دے تقدس اتے بالا دستی دی جنگ لڑی اتے لڑدے راہسوں۔ پیپلزپارٹی ہمیشہ جمہوریت کوں مضبوط کیتا اتے پارلیمنٹ کو ںطاقت ور بنڑایا۔ آصف زرداری آکھیا جو اساںکہیں شخصیت نال نی لڑدے ،اساڈی لڑائی انہاں طاقتاں اتے سوچ نال ہے جیرھیاں جمہوریت کوں کمزور رکھنڑ چاہندیاں ہن۔
انہاں آکھیا جوپیپلزپارٹی دا فلسفہ انتہا پسندی دے خلاف ہے ، اساںہرطرح دی شدت پسندی دی مزاحمت کیتی اتے آئندہ وی کریندے راہسوں۔ آصف زرداری آکھیا جو ایں ملک کوں سبھ توں پہلا آئین ذوالفقار علی بھٹو ڈتا اتے اساں ایں آئین کوں بحال کرتے بینظیر بھٹو شہید دامشن پورا کیتا۔ انہاں آکھیا جووفاق دی مضبوطی ایندی اکائیاں دی مضبوطی نال جڑی ہوئی ہے، صوبیں دی خود مختاری تے کوئی سمجھوتہ کائناں کریسوں۔ پیپلز پارٹی صوبیں کوں خودمختاری ڈتی اتے جڈاںضرورت پوسی ایں خود مختاری دے تحفظ سانگے میدان اچ کھڑے تھیسوں۔
