اسلام آباد (پاکستان پوائنٹ نیوز29 نومبر2018ء) وسل بلوئرپروٹیکشن اینڈ ویجی لینس کمیشن بل 2018 ءدے مسودہ کوں منظوری سانگے وختی وفاقی کابینہ اچ پیش کیتا ویسی۔ وزارت قنون تے انصاف وزیر اعظم دے 100 ڈینھاں دے ایجنڈے تحت ایں بل دے مسودے کوں فائنل شکل ڈے ڈتی ہے۔ اے پی پی کوں ملنڑ آلیاں دستاویزات مطابق ایں بل دی منظوری دے بعد بد عنوانی توں متعلق آزاد کمیشن کو ںمعلومات ڈتیاں ویسن۔
ایہ کمیشن دستیاب معلومات دی بنیاد تے منی لانڈرنگ اتے کرپشن توں متعلق شکایات نیب، ایف آئی اے، ایس ای سی پی، وفاقی اتے صوبائی اینٹی کرپشن دے محکماں کوں بھیجسی۔ ایں قنون تحت کمیشن معلومات ڈیونڑ آلے بندے دا ناں صیغہ راز اچ رکھیسی اتے متعلقہ ادارے اچ خود مدعی بنڑسی۔ معلومات ڈیونڑ آلے بندے دا ناں صیغہ راز اچ رکھنڑدامقصد ایندے تحفظ کوں یقینی بناونڑ ہے تاں جوکہیں کیس اچ وسل بلوئر تحت فراہم کیتی گی معلومات تے ریکوری دی صورت اچ مذکورہ بندے کوں 20 فیصد رقم وی ملسی،تاں جو ہک توں ودھ بندیاں دی معلومات تے ریکوری دی صورت اچ مجموعی رقم دی 20 فیصد رقم معلومات ڈیونڑ آلے سارے بندیاں اچ برابر تقسیم کیتی ویسی۔
ایں قنون تحت شکایت کنندہ کو ںنوکری توں کڈھنڑ سانگے، انضباطی کاروائی اتے دھمکیاں توں تحفظ ڈیونڑ ہے۔ کمیشن کوں ایں قنون تحت کہیں وی محکمے، حکام یا بندے توں معلومات گھنڑ دا اختیار حاصل ہو سی۔ جھوٹی اطلاعات تے 2 سال قید، 2 لکھ جرمانہ یا ڈوہائیں سزاواں ڈتیاں ویسن۔ وزارت قنون تے انصاف حکام اے پی پی کوں ڈسایا جو وسل بلوئر پروٹیکشن اینڈ ویجی لینس کمیشن بل 2018 دے مجوزہ مسودے کوں فائنل شکل ڈے ڈتی گی ہے اتے اینکوںمنظوری سانگے وختی وفاقی کابینہ اچ پیش کیتا ویسی۔
