اسلام آباد (پاکستان پوائنٹ نیوز28نومبر2017ء) پاکستان اچ مکئی دی فی ایکڑ پیداوار 5 میٹرک ٹن ہے جڈاں جو بھارت اچ صرف 3 میٹرک ٹن فی ایکڑ پیداوار حاصل تھیندی ہے۔ چین اچ مکئی دی اوسط فی ایکڑ پیداوار 6 میٹرک ٹن ہے۔ خطے دے بئے ملکاں دے مقابلے اچ فی ایکڑ چنگی پیداوار دے باوجود پاکستان مکئی دی اوسط فی ایکڑ پیداوار حاصل کرنڑ آلے 10 وڈے ملکاں دی فہرست اچ شامل کائنی ہے۔
زرعی شعبہ دے ماہرین ڈسائے جو پاکستان اچ مکئی دی سالانہ پیداوار 60 لکھ ٹن ہے جیندے اچ ودھارے دے ڈھگ سارے امکانات موجود ہن۔ ماہرین ڈسائے جومکئی دی کاشت سانگے بئی فصلاں دے مقابلے اچ آبپاشی سانگے بہوں گھٹ پانڑیں دی ضرورت ہوندی ہے۔مکئی دی کاشت دے ودھارے نال زرعی شعبہ کوں درپیش پانڑیں دے مسئلیاں اچ وی وی گھٹکی لاتی ونج جا سگدی ہے۔ صحت اتے خوراک دے شعبہ دے ماہرین ایںحوالے نال آکھیے جو مکئی توں حاصل تھیونڑ آلا ویجیٹیبل آئل انسانی صحت سانگے بہوں فائدے آلا ہے جڈاں جو ایندے توں ویلیو ایڈڈ مصنوعات تیارکرتے قیمتی زرمبادلہ کماونڑ اچ ودھارا کیتا ونج جاسگدے۔
انہاں ڈسائے جومکئی ہک منافع ڈیونڑآلی فصل ہے اتے آونڑ آلی نسل لازمی طورتے گنے دی بجائے مکئی دی کاشت کو ںترجیح ڈیسی۔ ماہرین ڈسائے جومکئی توں حاصل تھیونڑ آلی مصنوعات ڈیری، خوراک دی مصنوعات سمیت بیکری اتے بئی مصنوعات تیارکرنڑ سانگے خام مال دے طور تے استعمال تھیندی ہے۔ زرعی ماہرین ڈسائے جو ہمسایہ ملک چین اچ مکئی دی سالانہ پیداوار 225 ملین ٹن ہے اتے چین اپنڑیں ضرورتاں سانگے مکئی درآمد وی کریندے ۔ انہاں آکھیے جوچین پاکستان اقتصادی راہداری منصوبہ ( سی پیک) تحت پاکستان مکئی دی پیداوار ودھا تے برآمدات دے فروغ نال ڈھگ سارا فائدہ گھن سگدے ،جیندے نال قومی تے زرعی معیشت تے خوش گوار اثرات مرتب ہوسن اتے دیہاتی معیشت دی ترقی اچ وی مدد ملسی۔
