اسلام آباد (پاکستان پوائنٹ نیوز28نومبر2017ء) سینٹ دی قائمہ کمیٹی آبی وسائل کوں ڈسایا گئے جو مہمند ڈیم تے کم آندے سال فروری اتے دیامر بھاشا ڈیم تے کم مئی جون اچ شروع تھی ویسی۔ واپڈا نیلم جہلم اتے تربیلا فور ورگے روکے ہوئے منصوبے مکمل کیتے ہن، بلوچستان حکومت کچھی کینال توں 74 ہزار ایکڑ فٹ پانڑیں وچوں 10 ہزار توں ودھ حاصل کرنڑ دی استعداد نی رکھیندی، پی ایس ڈی پی اچ آبی وسائل دے 86 منصوبیں وچوں 36 بلوچستان دے ہن، ارکان پارلیمنٹ اپنڑیاں ترجیحات ڈیسن اساں انہاں منصوبیں وچوں وسائل مطابق اوہ منصوبے مکمل کر ڈیسوں۔
قائمہ کمیٹی دا اجلاس بدھ کوں چیئرمین سینیٹر شمیم آفریدی دی صدارت اچ منعقد تھیا۔ اجلاس اچ سینیٹر حاصل بزنجو، ڈاکٹر جہانزیب جمال دینی، سردار اعظم خیل، سینیٹر عثمان کاکڑ، سینیٹر گیان چند اور سینیٹر صابر دے علاوہ سیکرٹری آبی وسائل شمائل خواجہ، چیئرمین واپڈا لیفٹیننٹ جنرل (ر) مزمل حسین اتے بئے متعلقہ افسراں شرکت کیتی۔ سیکرٹری آبی وسائل شمائل خواجہ کمیٹی کوں ڈسایا جو پی ایس ڈی پی تحت بلوچستان دے36 وچوں 32 منصوبے منظورتھئے ہوئے ہن، مجموعی طور تے آبی وسائل دے منصوبیں سانگے 70 ارب روپے دی ضرورت ہے، ہنڑ تئیں 22 ارب روپے دا خرچ تھی گئے ،47.3 ارب روپے بئے جاری سال اچ خرچ کیتے ویسن۔
انہاں آکھیا جو اگر ارکان پارلیمنٹ سفارش کرنڑ تاں اساں بلوچستان دے منصوبیں سانگے ساری رقم ترجیحی منصوبیں تے خرچ کر سگدوں۔ انہاں آکھیا جو 14 توں 30 سال سانگے اگر نویں منصوبے نہ ڈتے ونجنڑتاں ول جا تے اساںاج دی لاگت دے سارے منصوبے مکمل کر سگدوں۔ انہاں آکھیا جوکراچی اچ پانڑیں دی فراہمی سانگے کے فور منصوبہ وی وسائل دی گھٹکی دا شکار ہے اتے ایندی لاگت کئی گنا ودھ گی ہے، ایہاصورتحال رہی تاں ول کراچی دے شہریاںکوں پانڑیں دی دستیابی داایہ منصوبہ کڈاہیں مکمل کائناں تھی سگسی ۔
کمیٹی کو ں ڈسایا گیا جو باڑہ ڈیم بنڑاونڑ سانگے 2002ءاچ پی سی ون دی تیاری دا عمل شروع تھیا، ڈیم دی اچائی302 فٹ ہے جڈاں جو85 ہزار 363 ایکڑ فٹ پانڑیں ذخیرہ کرنڑ دی گنجائش ہے اتے ایندے توں 6 میگاواٹ بجلی حاصل ہوسگسی، ستمبر 2009ءاچ پہلے پی سی ون اچ 14 ارب 20 کروڑ 80 ہزار روپے لاگت دی منظوری ڈتی گی ہائی جیندا دسمبر 2009ءاتے اپریل 2010ءاچ ٹینڈر جاری تھیا لیکن کہیں بندے کوئی بولی نی ڈتی۔
انہاں آکھیا جو پی سی ون ٹو تحت ایندی لاگت ہنڑ کئی گنا ودھ گی ہے جیرھاجووزارت آبی وسائل کنوں جمع کرا ڈتا گئے۔ چیئرمین قائمہ کمیٹی خزانہ ڈیم بنڑاونڑ سانگے جاءدی تبدیلی دے معاملہ دا جائزہ گھنڑ سانگے کمیٹی بنڑاونڑ دی منظوری ڈتی اتے کمیٹی سفارش کیتی جو پی ایس ڈی پی اچ موجود فنڈز دی دستیابی مطابق بلوچستان اچ ہک یا ڈو چھوٹے ڈیم ترجیحی بنیاد تے مکمل کیتے ویسن اتے سی پیک اچ وی بلوچستان دے آبی ذخائر بنڑاونڑ دے منصوبے شامل کیتے ویسن۔
