خانپور(پاکستان نیوز پوائنٹ 20اکتوبر2016ء) سہجہ حادثہ دی تفتیش نواں راخ گھن گئی اے،چیمہ بس کمپنی دی بس دا ڈرائیور یاسر شاہ زندہ نکلیا اتے ذال بالاں کوں گھن کراہیں نا معلوم جاہ تے فرار تھی گئے ،گھر کوں تالے لا ڈتے گئن ،پولیس گرفتاری سانگے تکڑی تھی گئی اے،گزریل ڈینھ تھیونڑ آلے تصادم اچ انتظامیہ کوں ڈسایا گئیا جو ڈوہاں بساں دے ڈرائیور حادثہ اچ جاں بحق تھی گئے ہن ،چیمہ بس کمپنی دے ڈرائیور یاسر شاہ جیڑھا جو بہاولپور دا رہنڑ آلا اے ،اوں حادثے ویلھے ٹرپ مار ڈتا ہئی جئیں دے بعد بس ونڑ نا ل ٹکرا گئی ڈرائیور دی سیٹ تے لاش موجود ہئی جئیں کوں پولیس ڈرائیور سمجھ گھد اہئی پر بعد اچ اوندی لاش دی شناخت شبیر بھٹی دے ناں نال تھئی ،پولیس آپنڑی تفتیش دا دائرہ کار ودھایا تاں پتہ لگیا جو ڈرائیور یاسر شاہ زندہ اے اتے حادثہ دے ڈینھ او حادثے آلی جاہ توں بھج کراہیں آپنڑے گھر بہاولپور آ گئیا اتے آپنڑے ٹبر کوں گھن گراہیں بھج گئیا۔
ذرائع دے مطابق پولیس چیمہ کمپنی دے صادق آباد اتے خان پور اچ موجود اڈہ ڈرائیوراں کوں پکڑ گھدے اتے کمپنی دے مالک دی گرفتاری دا وی امکان اے۔
