اسلام آباد (پاکستان نیوز پوائنٹ یکم اکتوبر2016ء) پاکستان بزنس مین اینڈ انٹلیکچولز فور م دے صدر اتے بزنس مین پینل دے سینیئر وائس چیئر مین میاں زاہد حسین آکھیا جو وزیر اعظم نواز شریف اقوام متحدہ اچ آپنڑیں خطاب اچ مسئلہ کشمیر کوں اجاگر کیتا اتے دنیا کوں بھارتی مظالم دی حقیقی تصویر ڈیکھائی۔ بھارت دے وزیر اعظم اتے بئے حکمت عملی بنڑاونڑآلے ایں گالھ کوں چنگی طرح جانڑدے ہن جو انہاں کوں جارحیت دا ڈو ٹوک جواب ڈتا ویسی ، جیندے نال جنوبی ایشیاء دا امن اتے معیشت تباہ تھی ویسی ، اتے ارباں لوک متاثر تھیسن، جڈانجو ایندے باوجود انہاں دے جنون اچ کئی کمی کائنی آندی پئی ۔
انہاں آپنڑیں ہک بیان اچ آکھیا جو سیاستداناں کوں لہور اچ احتجاج دے بجائے مقبوضہ کشمیر اچ جاری بھارتی مظالم دے خلاف احتجاج کرنڑاں چاہیدی ہے ۔ انہاں آکھیا جو وزیر اعظم اسلامی دنیا دی اہم اتے ذمہ دار ایٹمی مملکت دے سربراہ دی حیثیت نال جنرل اسمبلی اچ ہک جامع خطاب کیتا اتے عالمی رہنماوا ں کوں ڈسایا جو پاکستان دہشتگردی پاروں بہوں نقصانات چاتے ہن اتے آپریشن ضرب عضب نال دہشت گرداںدے خلاف کامیاب کارروائیاں کیتیاں ہن ۔
انہاں خطے اچ بھارتی فوج دے مظالم دا ذکر کیتا اتے مطالبہ کیتا جو مقبوضہ کشمیر نال بھارتی فوج دا انخلا کیتا ونجے اتے اقوام متحدہ بھارتی مظالم دیاں تحقیقات کرے جیندے نال کشمیر کاز کوں تقویت ملے۔ میاں زاہد حسین آکھیا جو وزیر اعظم مقبوضہ کشمیر اچ بھارتی مظالم دے ثبوت اقوام متحدہ کوں ڈیونڑ دا اعلان کیتے ،جیندے تے فوری عمل کیتا ونجے تانجو دنیا کوں ایں ملک دا اصل چہرہ ڈیکھایا ونج سگے ۔ بھارت صرف پاکستان دے خلاف گھیرا تنگ کرنڑ دے خواب نہیں ڈیکھدا پئے جڈانجو ایں ملک اچ ساریاں اقلیتاں بشمول مسلماناں، سکھاں، دلتاں اتے عیسائیاں تے ہندو بنیاد پرست مظالم ڈھا ندے پئے ہن ۔
