اسلام آباد(پاکستان نیوزپوائنٹ 13اپریل 2018ء) پاکستان پیپلز پارٹی دے پارلیمانی لیڈر سید نوید قمر آکھیا جو 1973دا آئین ہک مقدس دستاویز اے‘ ایندے اچ کہیں کوں وی ہک لفظ لکھنڑ دی اجازت کائنی ‘ پارلیمنٹ ہی ایندے اچ تبدیلی دا اختیار رکھیندی اے ۔جمعے کوں قومی اسمبلی اچ اعتراض دے نکتے تے سید نوید قمر آکھیا اے واقعی ایجھا ڈینھ ہئی جیں وقت ضرورت ایں گال دی ہئی جو اساں آئین بنڑاونڑ آلیں دے کردار تے بحث کریندے ۔
ایندے اچ کوئی شک کائنی جو ذوالفقار علی بھٹو دا وژن اتے ساریاں جماعتاں دا کٹھا تھی ونجنڑ ہک بہوں وڈا کارنامہ اے ۔ ایں آئین دا کمال اے ہے جو بہوںواری مارشل لاءلگے مگر اے آئین ختم کائنی تھی سگیا ۔انہاں آکھیا جڈاں ساریاں سیاسی جماعتاں کٹھیاں تھی ویندن ملک دی ڈائریکشن بدلی ونج سگدی اے ۔انہاں آکھیا 1973دے آئین اچ کہیں کوں کوئی لوظ لکھنڑ دی اجازت کائنی ۔ اے استحقاق صرف پارلیمنٹ دا ہے جو نااہلی دی کوئی حد مقرر کرنڑیں چاہیدی اے یا کائناں ایں حوالے نال صرف پارلیمنٹ نال رجو ع کرنڑاں چاہیدے ۔
