اسلام آباد (پاکستان نیوزپوائنٹ 12مارچ2018ء) وزیراعظم شاہد خاقان عباسی آکھیے جو پاکستان سعودی عرب نال اپنڑے تعلقات کوں بہوں اہمیت ڈیندے، امام کعبہ دے دورہ پاکستان نال ڈوہان ملکاں اتے عوام دے تعلقات بئے گوڑھے تھیسن۔انہاں اے گالھ وزیراعظم آفس اسلام آباد اچ امام کعبہ الشیخ ڈاکٹر صالح بن محمد بن طالب نال گال مہاڑ اچ آکھی۔ وزیراعظم امام کعبہ دا وزیراعظم آفس اچ استقبال کیتے۔
امام کعبہ نال پاکستان اچ سعودی عرب دے سفیر نواب سعید المالکی اتے بئے سعودی حکام وی آئن۔ایں موقع تے وفاقی وزیر مواصلات حافظ عبدالکریم، وفاقی وزیر مذہبی امور سردار محمد یوسف، سینیٹر پروفیسر ساجد میر اتے سرکاری حکام موجود ہن۔وزیراعظم سعودی وفد دا خیر مقدم کریندے آکھیے جو پاکستان دے عوام امام کعبہ دا بہوں احترام کریندن اتے انہاں دے آونڑ کوں اعزاز سمجھدن۔ امام کعبہ پرجوش استقبال تے پاکستان دی حکومت اتے عوام دا شکریہ ادا کیتے اتے آکھیے جو پوری امت مسلمہ پاکستان کوں اپنڑی طاقت سمجھدی اے۔خطے اچ امن کیتے پاکستان دیاں کوششاں قابل تعریف ہن۔
