اسلام آباد (پاکستان نیوزپوائنٹ21نومبر2017ء) سپریم کورٹ فیض آباد دھرنے دا نوٹس گھندے ہوئیں سیکرٹری دفاع اتے سیکرٹری داخلہ توں تفصیلی رپورٹ طلب کریندے ہوئیں آکھیا ہے جو عدالت کوں ڈسایا ونجے جو عوام دے بنیادی حقوق دے تحفظ سانگے حکومت کیا اقدامات کیتے ہن۔ سپریم کورٹ اے نوٹس منگل کوں ہک سماعت دے دوران گھدا جیں اچ وکیل ابراہیم ستی عدالت کوں آکھیا جو او دھرنے پاروں کیس دی تیاری نی کر سگکیے ایں کیس دی سماعت ملتوی کیتی ونجے ۔
جسٹس فائز عیسیٰ دھرنے دا نوٹس گھندے ہوئیں سیکرٹری دفاع اتے سیکرٹری داخلہ توں رپورٹ منگ گھدی۔ عدالت آئی جی پولیس پنجاب، آئی جی پولیس اسلام آباد اتے اٹارنی جنرل کوں نوٹس جاری کرڈتے ہن۔ عدالت ریمارکس ڈتے جو کیرھی شریعت لوکاں دا رستہ بند کرنڑ دی اجازت ڈیندی ہے ۔
