اسلام آباد (پاکستان نیوزپوائنٹ13اکتوبر2017ء) مولانا مفتی محمود دے اعزاز اچ یادگاری ٹکٹ دے اجرادی خصوصی تقریب جمعے کوں اتھاں وزیراعظم سیکر ٹریٹ اچ منعقد تھی ۔تقریب توں خطاب کریندے ہوئیں وزیراعظم شاہد خاقان عباسی آکھیا جو تقریب اچ شرکت سانگے میڈے سانگے اعزاز دی گالھ ہے ایندے اچ ہک ایجھی پر وقار شخصیت تے گالھ مہاڑ کریندے پیوں جیں دی قومی سیاست اچ بہوں خدمات ہن ۔
انہاں آکھیا جو مولانا مفتی محمود اسلام سانگے ودھ ساریاں خدمات سر انجام ڈتیاں تے ہر بندہ جانڑدا ہے جو انہاں اسلام دی خدمت دے اعتراف اچ یادگاری ٹکٹ جاری کیتا ویسی تاں جو تاریخ اچ انہاں دی خدمات کوں یاد رکھیا ویسی۔انہاں وزارت پوسٹل سروسز دے حکام کوں تجویز پیش کیتی جو پاکستان دی خدمت کرنڑ آلے بئے مذہبی تے سیاسی اکابرین سانگے وی یادگاری ٹکٹ جاری کیتے ونجن ۔
انہاں آکھیا جو پوسٹل سروسز دے شعبے اچ بہوں ساری جدت پید ا کیتی ونج سگدی ہے جیرھا جو وقت حاضر دا تقاضا وی ہے ۔ وزیراعظم شاہد خاقان عباسی مولانا مفتی محمود دی شخصیت، انہاں دی خدمات، ملک تے آئین اتے پارلیمان تے طرز سیاست سانگے کیتی ونجنڑ آلی خدمت کوں سرہیندے ہوئیں آکھیا جو انہاں اقدار دی اج وی ضرورت ہے ۔ تقریب اچ ڈپٹی چیئرمین سینیٹ مولانا عبدالغفور حیدری، جمعیت علمائے اسلام (ف) دے رہنما مولانا فضل الرحمان، وزارت پوسٹل سروسز دے وزیر مولانا امیر زمان، وفاقی وزیر ہاﺅسنگ و تعمیرات اکرم درانی سمیت بیاں مختلف شخصیات شرکت کیتی جڈاں جو مولانا فضل الرحمان وی ایں موقع تے خطاب کیتا ۔
