اسلام آباد (پاکستان پوائنٹ نیوز 02 -اگست2016 ء) اجوکے سال 2016ء دے پہلے چھی مہینے اچ چھوٹے قرضے (مائیکرو لونز) گھنڑ آلیاں دی تعداد 40 لکھ توں تجاوز کر گئی جڈآنجو 31 مارچ 2016ء تئیں چھوٹے قرضیں دا حجم 105 ارب روپے تئیں پج گیا۔ پاکستان مائیکرو کریڈٹ نیٹ ورک (پی ایم این) دے اعدادو شمار مطابق ملک وچ مائیکرو انشورنس پالیسی ہولڈرز دی تعداد 55 لکھ توں ودھ گئی ہے جڈانجو مائیکرو سیونگز داحجم 68 ارب روپے تئیں پج گے۔
مائیکرو فنانس دے شعبے دی ترقی اتے ودھ توں ودھ لوکاں کوںفائدہ پجاونڑ سانگے شرح سود وچ گھٹکی ' قرضیاں دی فراہمی سانگے پراسیسنگ دیاں سہولتاں تھکیاںاتے خدمات دے معیار کوں چنگا بنڑاونڑ دی ضرورت ہے۔ رپورٹ دے مطابق ایں ویلھے ملک وچ مائیکرو فنانسنگ دیاں سہولتاں دے خواہشمند لوکاں دی تعداد تقریباً 20.5 ملین ہے اتے مارچ 2016ء دی چھیکڑ تائیں 19.5 فیصد بندیاں کوں سہولت فراہم کیتی گئی ہے۔
مائیکرو فنانس دیاں سہولتاں دی فراہمی دے اداریاں مطابق مائیکرو فنانسنگ دے خواہشمند لوکاں دی سہولت سانگے حکومتی سطح تے اقدامات دی ضرور ت ہے جڈانجو ایں حوالے نال دیہاتی عوام وچ شعور اجاگر کرنڑ وی ضروری ہے تاں جو ا وہ چھوٹے قرضے گھنڑنال چنگا فائدہ چا سگن۔ رپورٹ دے مطابق ودھ توں ودھ لوکاں تئیں سہولت دی فراہمی سانگے حکومتی سطح تے چنگے اقدامات دی ضرورت ہے تاں جو غربت دی شرح وچ گھٹکی لائی ونج سگے۔
