آخبت نا شونداری نا دارومدار آبی کوڑی تے ٹی ودکی و دیر انا مناسب کاریم اٹ اتنگ آٹی ءِ ڈپٹی چیئرمین پلاننگ کمیشن سرتاج عزیز نا دیوان آن تران

اسلام آباد(پاکستان نیوزپوائنٹ 30مارچ2018ء) ڈپٹی چیئرمین پلاننگ کمیشن سرتاج عزیز پارینے کہ پاکستان اٹی دیر انا کمتی ءِ مر کننگ و بجلی ودی کننگ کن ننے بایدے مرے کہ آبی وسیلہ غاتے کن گچین ڈٹ بندی اولیتی بنداوتیا کین، پلاننگ کمیشن ءِ دا یخین ءِ کہ دیر انا کوڑی تے رکھ کرسا کشاری شونداری ٹی اہم کڑد ادا کننگ مریک، داڑکن دیر اناکاریم اٹ اتنگ اٹی کفایت شعاری ہراٹی فصل آتے دیر تننگ کن مناسب وڑوڈول، ہندن ءُ فصل دسنگ ہرافتے ٹی دیر کم آن کم کاریم اٹ اتنگے و فصل آتے دیر تننگ نا پوسکن آ وڑوڈول آتے درستی راستی کرفنگ نا سخت گرج ءِ ، ملک انا آخبت نا شونداری نا دارومدار پاکستان نا آبی کوڑی تیٹی ودکی و مناسب کاریم اٹ اتنگ آٹی ءِ ہراڑکن بنجائی حکومت تینا کڑد ءِ ادا کننگ ءِ۔

اوداخیال آتا درشانی ءِ تدوک آ دے سینٹرل ڈویلپمنٹ ورکنگ پارٹی نا دیوان آن تران کرسا کرے۔ دیوان اٹی ملک اٹی آبی وسیلہ غاتا بابت کیہی ڈٹ آتا منظوری ءِ تننگا۔

دیوان اٹی رحیم یار خان اٹی ڈیلاس کنال ڈویژن نا ہند آ سپلائی بند انا کٹائی و ودکی کن 13کروڑ 69 لکھ 6ہزار روپئی نا ڈٹ منظور کننگا۔

جے ہیڈ سپیر نا ودکی

کن 13کروڑ 35لکھ 79 ہزار روپئی نا خڑچ انا ڈٹ منظور کننگا۔ کوئٹہ ٹی ڈغاری دیر انا ری چارج کن 200 چنکو چیک ڈیم تا جوڑ جاڑ کن 29 کروڑ 83لکھ 68 ہزار روپئی نا ڈٹ منظور کرے۔

ضلع خضدار نا تحصیل وڈھ اٹی سٹوریج ڈیم انا جوڑ جاڑ کن 46کروڑ 21لکھ 6ہزار روپئی نا ڈٹ منظور کننگا۔ ضلع خضدار اٹی ڈیم انا جوڑ جاڑ کن 40 کروڑ روپئی نا خڑچ انا ڈٹ پیش کننگا ہرادے دیوان اٹی منظور کننگا۔

ضلع خضدار اٹی کنگوری 11 اسٹوریج ڈیم انا جوڑ جاڑ کن 9 کروڑ 43لکھ 50 ہزار روپئی نا ڈٹ منظور کننگا۔ ضلع خضدار اٹی بہر اسٹوریج ڈیم انا جوڑ جاڑ کن 8 کروڑ 97 لکھ 80 ہزار روپئی نا ڈٹ انا منظوری تننگا۔

ضلع خضدار نا علاقہ وڈھ اٹی ٹک اسٹوریج ڈیم انا جوڑ جاڑ کن 22 کروڑ 64لکھ 6ہزار روپئی نا ڈٹ منظور کرے۔ ضلع گوادر اٹی ڈوسی ڈیم انا جوڑ جاڑ کن 49 کروڑ 98 ہزار روپئی نا خڑچ انا ڈٹ منظور کننگا۔

ضلع موسیٰ خیل اٹی خزینہ ڈیم انا جوڑ جاڑ کن 30 کروڑ روپئی نا خڑچ انا ڈٹ منظور کرے۔ ضلع نوشکی ٹی خیصر پتی ڈیم انا جوڑ جاڑ کن 11 کروڑ 47 لکھ 7 ہزار روپئی نا ڈٹ منظور کننگا۔

ضلع نوشکی ٹی راکوڈیم انا جوڑ جاڑ کن 5 کروڑ نا خڑچ انا ڈٹ منظور کننگا۔