پاڪستان سائنس ۽ ٽيڪنالاجي، صنعت ۽ ڪم ۽ اقتصادي ترقي جي نئين دور ۾ قدم رکي چڪو آهي: صدر ممنون حسين
اسلام آباد (پاکستان نیوزپوائنٹ14نومبر2017ء) صدر ممنون حسين چيو آهي ته پاڪستان سائنس ۽ ٽيڪنالاجي، صنعت ۽ ڪم ۽ اقتصادي ترقي جي نئين دور ۾ قدم رکي چڪو آهي، نئين دور جون گهرجون مڪمل ڪرڻ جي لاءِ سائنسدان ۽ محقق پنهنجي ڀرپور توانائيون استعمال ڪن، خلائي تحقيق جو شعبو ان سلسلي ۾ انتهائي اهم آهي. هن اها ڳالهه ڪالهه اڱاري ڏينهن انسٽيٽيوٽ آف اسپيس ٽيڪنالاجي (آءِ ايس ٽي) ۾ پنجين عالمي ايرو اسپيس سائنس ۽ ٽيڪنالاجي ڪانفرنس جي افتتاحي تقريب کي خطاب ڪندي چئي. ان موقعي تي ڪانفرنس جي چيئرمين ۽ آءِ ايس ٽي جي وائيس چانسلر انجنيئر عمران رحمان ۽ آءِ ايس ٽي جي ڊين ڊاڪٽر اقبال مسعود پڻ ڳالهايو. صدر چيو ته اسان جي تعليمي ۽ تحقيقي ادارن بي مثال ڪارڪردگي جو مظاهرو ڪيو آهي پر اڃا گهڻو ڪم ڪرڻو آهي. هن چيو ته گذريل 2 ڏهاڪن دوران خلائي تحقيق جي شعبي ۾ رڪارڊ ترقي ٿي چڪي آهي ۽ دنيا جي ڪجهه خاص ترقي يافته ملڪ ئي نه پر اسان جا ڪجهه پاڙيسري ملڪ به ان ميدان ۾ تمام اڳتي نڪري ويا آهن. سائبر ٽيڪنالاجي ذريعي نه رڳو رهڻي ڪهڻي پر ڪاروباري طور طريقن ۽ چرپر جي ذريعن ۾ پڻ تبديلي اچي رهي آهي. صدر چيو ته انهن چئلينجن کي منهن ڏيڻ جي لاءِ سائنس ۽ ٽيڪنالاجي جي شعبي جو ڪردار اهم آهي، ان لاءِ ضروري آهي ته آءِ ايس ٽي ۽ اسپارڪو سميت ٻيا سمورا ادارا پنهنجي تحقيقي منصوبن ۾ سگهه پيدا ڪن. هن چيو ته پاڪستاني سائنسدانن ۽ محقيقن پنهنجي طور تي شاندار ڪارناما سرانجام ڏنا آهن. صدر چيو ته انسٽيٽيپوٽ آف اسپيس ٽيڪنالاجي قومي يونيورسٽين ۾ اهم مقام رکي ٿي.
هن اميد جو اظهار ڪيو ته هي ادارو ٻين ملڪن ۽ ادارن جي تعاون سان نوان منصوبا شروع ڪري ملڪ جي ترقي ۾ پنهنجو ڪردار ادا ڪندو. صدر چيو ته ملڪ جا محدود وسيلا علمي ۽ تحقيقي سرگرمين ۾ سدائين اثرانداز ٿيندا رهيا آهن پر ان جي باوجود پاڪستان حڪومت هر دور ۾ سائنس ۽ ٽيڪنالاجي جي شعبي جي فراخدلاڻي سرپرستي ڪئي آهي. هن اميد جو اظهار ڪيو ته مستقبل ۾ به اها روايت برقرار رهندي. صدر چيو ته خلائي تحقيق جي موضوع تي علمي سرگرميون ۽ ان ڪامياب عالمي ڪانفرنس منعقد ڪرڻ مان واضح ٿئي ٿو ته دنيا جي علمي نقشي تي پاڪستان جو مقام انتهائي نمايان ٿيڻ وڃي رهيو آهي. هن اميد جو اظهار ڪيو ته ان صورتحال ۾ وڌيڪ بهتري ايندي پر ان جي لاءِ ضروري آهي ته نوجوان ۽ سينيئر سائنسدان روايتي طور طريقن کي ڇڏيندي تحقيق ۽ ترقي جي ميدان ۾ نوان مثال قائم ڪن. صدر چيو ته جڏهن ڪنهن قوم جا سائنسدان ۽ محققين پنهنجي محنت ۽ سچائي سان اول درجي تي پهچن ٿا ته پوءِ وسيلن جي کوٽ انهن جي راهه ۾ ڪڏهن رڪاوٽ نه ٿي بڻجي سگهي. ان کان اڳ انسٽيٽيوٽ آف اسپيس ٽيڪنالاجي جي وائيس چانسلر انجنيئر عمران رحمان چيو ته سائنس ۽ ٽيڪنالاجي ۾ اڳڀرائي ۽ قومي ترقي جو پاڻ ۾ گهرو تعلق آهي، پاڪستان جا سائنسدان خاص طور تي خلائي ٽيڪنالاجي جي ميدان ۾ چئلينجن کي منهن ڏيڻ جي لاءِ محنت سان ڪم ڪري رهيا آهن، بعد ۾ صدر مقامي طور تي تيار ڪيل سازسامان ۽ خلائي تحقيق ۽ ترقي جي مختلف منصوبن ۾ استعمال ٿيندڙ پرزن بابت هڪ نمائش جو پڻ دورو ڪيو ۽ انهن جي معيار کي ساراهيو.