بھارتی سپریم کورٹ نے فضائیا دے مسلمان ملازماں دے داڑھی رکھن اُتے پابندی لادِتی حکومت ولوں داڑھی اُتے پابندی دا فیصلا بنیادی حقاں دی خلاف ورزی نہیں: چیف جسٹس ٹی ایس ٹھاکر

نویں دِلی(پاکستان پوائنٹ نیوز16۔دسمبر2016ء) چیف جسٹس ٹی ایس ٹھاکرے دی سربراہی وچ بنچ نے نسلی فرق بارے رولز دی توثیق کردے ہوئے آکھیا اے کہ بھارتی فضائیا دے قواعد و ضابطے کسے بندے دے مذہبی حقاں وچ مداخلت نہیں اے۔

بھارتی سپریم کورٹ نے ائر فورس وچ نظم و ضبط دی پابندی اُتے زور دیندے ہوئے آکھیا اے کہ کسے وی مسلمان نوں اپنے مذہب نوں بنیاد بناندے ہوئے داڑھی ودھان دی اجازت نہیں دے سکدے جدکہ مرکزی حکومت ولوں داڑھی اُتے پابندی دا فیصلا بنیادی حقاں دی خلاف ورزی نہیں اے۔

یادر ہوے کہ 2008وچ بھارتی فضائیا دے اک مسلمان ائر مین انصاری آفتاب احمد نوں کور کمانڈنگ افسر

دی اجازت دے بغیر داڑھی ودھان دی وجہ توں نوکریوں کڈھ دِتا گیا سی۔

انصاری دا موقف سی کہ داڑھی ودھانا اوہدا بنیادی حق تے مذہبی آزادی اے۔ اوہناں نے دلیل دِتی سی کہ جس طرحاں فضائیا وچ سکھاں نوں داڑھی تے پگڑی دی اجازت اے، اوسے طرحاں اوہناں نوں اجازت دِتی جائے۔

ایس توں وکھ اک ہور افسر محمد زبیر نوں وی ایسے جرم پاروں نوکری توں کڈھ دِتا گیا سی، دوواں نے 24فروری 2003نوں جاری ایس حکم نامے نوں دِلی ہائی کورٹ وچ چیلنج کیتا سی پر دِلی ہائی کورٹ دے یک رکنی بنچ، تے بعد وچ ڈویژن نے اوہناں دی درخاست رَد کر دِتی جہنوں اوہناں نے سپریم کورٹ وچ چیلنج کیتا سی۔