ہیلمٹن(پاکستان پوائنٹ نیوز24۔نومبر۔2016ء) پاکستان کرکٹ ٹیم اپنی ساکھ تے دورا آسٹریلیا توں پہلے اعتماد دی بحالی دی جنگ ریگولر ٹیسٹ کپتان مصباح الحق دی غیر موجودگی وچ لڑن دی تیاری کر رہی اے جہدے لئی حتمی 11کھڈاریاں دے بارے خبراں آ رہیاں نیں کہ سابق کرکٹرز تے سلیکٹرز نے ہیڈ کوچ تے ٹیم مینجمنٹ نوں شرجیل خان توں اوپنگ کروان دا مشورا دِتا اے جدکہ اوہناں دا کہنا اے کہ اظہر علی 3تے بابر اعظم 6ویں نمبر اُتے کھیڈن لئی ٹھیک نیں۔
ایس صورتحال وچ ٹیم وچ صرف اک تبدیلی ہووے گی جدکہ نیوزی لینڈ وچ موجود ٹیم انتظامیا ہملٹن ٹیسٹ دی فاسٹ وکٹ توں بھرپور فائدا چُکن لئی وہاب ریاض نوں کھڈان اُتے غور کر رہی اے پر اوہناں دی تھاں کسے وی باﺅلر نوں باہر بٹھانا مشکل لگ رہیا اے، راحت علی، سہیل خان تے محمد عامر پہلے ٹیسٹ وچ چنگی کارکردگی وکھا چکے نیں جدکہ لیگ سپنئر یاسرشاہ
نوں باہر بٹھانا وی مشکل فیصلا ہووے گا کیوں جے ایسے ای گراﺅنڈ اُتے پچھلے ٹور وچ کھیڈے گئے مقابلے وچ پاکستانی سپنئر عبدالرحمن ٹیم نوں جَتوا چکے نیں۔
کُجھ وسیلیاں دا دعوا اے کہ بیٹنگ لائن اپ وچ محمد رضوان نوں شامل کرن اُتے سنجیدگی نال غور کیتا جا ریا اے جہدی وجہ توں ایہناں افواہواں نوں تقویت مل رہی اے کہ ٹیم مینجمنٹ دوجے ٹیسٹ توں پہلے حتمی ٹیم دے انتخاب تے کنڈیشنز توں ڈاڈھی پریشان اے۔
ہملٹن ٹیسٹ دی وکٹ مکمل طور اُتے فاسٹ باﺅلرز لئی موزوں قرار نہیں دِتی جا سکدی تے سپنرز وی ایتھے کامیابیاں سمیٹ سکدے نیں ، جہنوں ویکھدے ہوئے یاسر شاہ نوں باہر بٹھانا غلط فیصلا ہو سکدا اے۔
اطلاع دے مطابق ٹیم انتظامیا دوجے ٹیسٹ لئی اک توں ودھ تبدیلیاں کرن اُتے غور کر رہی اے پر امکان اے کہ مصباح الحق دی تھاں شرجیل خان دی رلت دی واحد تبدیلی کیتی جائے گی۔