اسلام آباد(پاکستان پوائنٹ نیوز15۔نومبر۔2018ء) بھارتی وزیر داخلا راج ناتھ سنگھ نے پاکستان دے لیجنڈ کرکٹر شاہد خان آفریدی دے بیان اُتے ردعمل دیندے ہوئے آکھیا کہ شاہد آفریدی نے جو کُجھ وی آکھیا اوہ سچ اے۔
پاکستان آپ اپنا ملک نہیں چلا سکدا تے اوہ کشمیر نوں کیویں سنبھالے گا۔ کشمیر ہمیشہ توں ای بھارت دا حصہ رہیا اے تے اگانہ وی بھارت دا حصہ ای رہوے گا۔
یاد رہوے کہ پچھلے دیہاڑے پاکستان دے سابق کپتان و مشہور آل راؤنڈر شاہد خان آفریدی نے لندن وچ اک تقریب وچ رلت کردے ہوئے جھیڑوا(متنازعہ) بیان دتا۔
شاہد آفریدی دا آکھنا سی کہ پاکستان نوں کشمیر دی لوڑ نہیں اے۔ پاکستان کشمیر نوں حاصل کرن دا خاہشمند اے۔ شاہد آفریدی دا آکھنا سی کہ پاکستان تے اپنے چار صوبے نہیں سنبھال سکدا، فیر کشمیر کیویں سنبھالے گا۔
شاہد آفریدی دا ہور آکھنا سی کہ کشمیر نہ بھارت نوں دو نہ پاکستان نوں ، کشمیر کشمیریاں نوں دے دیو، کشمیریاں نوں جین دتا جائے۔
شاہد آفریدی دا آکھنا سی کہ کشمیریاں نوں خود مختار علاقے وچ رہن دا حق حاصل اے۔ ایس بیان مگروں شاہد آفریدی نوں اک پاسے پاکستانیاں ولوں تنقید دا نشانہ بنایا جا رہیا اے تے دوجے پاسے بھارتی میڈیا شاہد آفریدی دے بیان نوں بنیاد بنا کے پاکستان نوں اک ناکام ریاست ثابت کرن دی کوشش کر رہیا اے۔
انج دے ماحول وچ شاہد آفریدی نے وضاحتی ردعمل دیندے ہوئے آکھیا اے کہ اوہناں دے بیان نوں توڑ مروڑ کے پیش کیتا گیا۔
میں اپنے ملک نال محبت کرنا واں تے کشمیریاں دیاں کوششاں نوں قدر دی اکھ نال ویکھنا واں۔ انسانیت سبھ توں اُچی ہونی چاہیدی تے اوہناں نوں اوہناں دے حق ملنے چاہیدے۔