عمران خان پریشان،وزیر اعظم دی میڈیا ٹیم پہلے 100دناں وچ ڈاڈھی طرحاں ناکام عمران خان نے ٹیم دے نال نال آپ وی میدان وچ آن دا فیصلا کر لیا

اسلام آباد(پاکستان پوائنٹ نیوز09۔اکتوبر۔2018ء) وزیراعظم دی میڈیا ٹیم ناکام ہوندی وکھالی دے رہی اے ، وزیراعظم پریشان، وزیر اعظم عمران خان نے ٹیم دے نال نال آپ وی میدان وچ آن دا فیصلا کرلیا۔

تفصیل مطابق پاکستان تحریک انصاف دی حکومت نوں بنے ہوئے لگ بھگ دو مہینے ہون والے نیں۔ اینے چِر وچ پاکستان تحریک انصاف دی حکومت اپنے 100دناں دے پلان اُتے عملدرآمد لئی پرعزم وکھالی دیندی اے۔

ایس سلسلے وچ جتھے تحریک انصاف دی حکومت مقبول فیصلے کر کے لوکائی دی حمایت حاصل کر رہی اے اوتھے اوہنوں کُجھ سخت فیصلے وی کرنے پے رہے نیں جیہدے کارن لوکائی ڈاڈھی بے چین نظر آ رہی اے۔

ایس ساری صورتحال وچ پاکستان

تحریک انصاف نوں سبھ توں ودھ پریشانی دا ساہمنا ملکی معیشت دا اے۔ اج سویرے کاروبار شروع ہون اُتے ڈالر دی قیمت 137رُپئے ہوگئی۔

فاریکس ڈیلرز مطابق انٹر بنک مارکیٹ وچ ڈالردی قیمت وچ 9رُپئے 74پیسے دا وادھا ہویا، جیہدے مگروں ڈالر دی قیمت 137رُپئے ہو گئی اے۔

انٹر بنک مارکیٹ وچ ڈالر دی قیمت و چ وادھے مگروں ڈالر دی قیمت 124-25رُپئے توں ودھ کے 137رُپئے ہوئی جدکہ اوپن مارکیٹ وچ ڈالر دی قیمت وچ 5رُپئے دا وادھا ہویا، جیہدے مگروں اوپن مارکیٹ وچ ڈالر دی قیمت 134رُپئے ہو گئی۔

ڈالر دی قیمت وچ اک دن دے دوران 12رُپئے وادھے مگروں پٹرولیم وستاں دیاں قیمتاں وچ 15رُپئے فی لیٹر وادھے دا امکان اے۔