اسلام آباد(پاکستان پوائنٹ نیوز24۔ستمبر۔2018ء) پہلی اکتوبر توں پٹرولیم وستاں دیاں قیمتاں وچ وادھے دا امکان ظاہر کیتا گیا جیہدی ہن آئل اینڈ گیس ریگولیٹری اتھارٹی(اوگرا) نے تردید کر دتی۔
ترجمان اوگرا عمران غزنوی نے پٹرولیم وستاں دیاں قیمتاں وچ وادھے دیاں خبراں نوں رد کردے ہوئے آکھیا کہ پٹرولیم وستاں دیاں قیمتاں وچ ممکنہ وادھے دیاں خبراں بے بنیاد نیں۔
اوہناں دا کہنا سی کہ پہلی اکتبوبر لئی اوگرا دا ورکنگ پیپر اگلے ہفتے تیار ہو ئے گا جدکہ قیمتاں وچ وادھے گھاٹے دی سمری 30ستمبر تیکرگھلی جائے گی۔
یاد رہوے کہ 22ستمبر نوں ملن والی خبر دے مطابق پہلی اکتوبر توں پٹرول 6رُپئے30پیسے، مٹی دا تیل 10رُپئے،لائٹ ڈیزل4رُپئے تے ہائی سپیڈ ڈیزل 8رُپئے 50پیسے مہنگا ہون دا امکان
اے۔
پٹرولیم وستاں دیاں قیمتاں وچ وادھا وزارت پٹرولیم دی منظوری مگروں کیتا جائے گی پر ایس حوالے نال اجے کوئی حتمی اعلان نہیں کیتا گیا۔
ایس توں پہلاں قومی اسمبلی دے اجلاس وچ خطاب کردے ہوئے وفاقی وزیر خزانہ اسد عمر نے آکھیا سی کہ بجٹ وچ تبدیلی نہ کیتی گئی تے اوکڑاں پیدا ہوسکدیاں نیں۔
اوہناں نے لوکائی نوں مہنگائی دے طوفان توں خبردار کیتا۔ اوہناں دا کہنا سی کہ رُپئے دی قدر وچ لگاتار کمی آ رہی اے جیہدے مگروں زرمبادلا دے ذخائر تیزی نال ڈگ رہے نیں۔
اوہناں دا ہورکہنا سی کہ زرمبادلا دے ذخائر ڈگن نال لوکائی نوں مہنگائی دا ساہمنا کرنا پے سکدا اے۔ اوہناں دا کہنا سی کہ جے رُپئے دی قدر ایس طرحاں ڈِگدی رہی تے پٹرول دی قیمت 20رُپئے فی لیٹر ودھ سکدی اے۔