لاہور(پاکستان پوائنٹ نیوز22۔ستمبر۔2018ء) سابق وزیر اعظم نواز شریف اڈیالا جیل توں رہائی مگروں اج سیاسی سرگرمیاں شروع کرن گے۔
تفصیل مطاق سابق وزیر اعظم نواز شریف نے اڈیالا جیل توں رہا ہون مگروں سیاسی حالات اُتے گل بات کرن توں انکار کر دتا سی ، پچھلے دیہاڑے مسلم لیگ (ن) دے کئی رہنما نواز شریف نال ملاقات لئی جاتی امرا گئے پر سکیورٹی والیاں نے اندر جان دی اجازت نہ دتی ۔
سکیورٹی اہلکاراں نے مسلم لیگ (ن) دے رہنماواں و کارکناں نوں دسیا کہ نواز شریف تے مریم نواز اجے اپنے گھر والیاں نال ویلا لنگھانا چاہندے نیں۔
پر اج سابق وزیر اعظم نواز شریف نے باقاعدہ طور اُتے سیاسی گرمیاں شرو ع کر دتیاں نیں۔ جاتی امرا وچ نواز شریف نال پارٹی رہنماواں دی ملاقات متوقع اے جیہدے وچ مستقبل دی سیاسی حکمت عملی اُتے مشاورت ہوئے
گی۔
پارٹی رہنماواں نال ملاقات دوران ضمنی الیکشن دی مہم وچ مریم نواز نوں متحرک کرن دا فیصلا وی کیتا جائے گا۔ وسیلیاں مطابق سابق وزیر اعظم میاں نواز شریف دی دھی مریم نواز نے پارلیمانی سیاست وچ آن دا فیصلا کرلیا ۔
ایس مقصد لئی مریم نواز لاہور دے حلقہ این اے 127توں ضمنی الیکشن وچ حصہ لین گیاں۔ مریم نواز نے جیل جان توں پہلاں وی ایسے حلقے توں الیکشن لڑن دا فیصلا کیتا سی پر سزا مگروں مریم نواز دی تھاں کوورنگ امیدوار علی پرویز نوں ٹکٹ دے دتا گیا۔
علی پرویز ملک رکن قومی اسمبلی پرویز ملک و ایم این اے شائستہ پرویز ملک دے پُتر نیں تے ایسے حلقے توں رکن قومی اسمبلی چُنے گئے سن۔
پتا چلیا اے کہ علی پرویز ملک ایس سیٹ توں استعفا دے دین گے ،جیہدے مگروں مریم نواز ایس حلقے توں الیکشن وچ حصہ لین گیاں۔