وزیراعظم عمران خان اُتے اعتماد دا اظہار متحدہ عرب امارات وچ اُچے عہدے اُتے کم کرن والی سوانی پاکستان واپس آ گئی

لاہور(پاکستان پوائنٹ نیوز25۔اگست۔2018ء) متحدہ عرب امارات وچ اُچے عہدے اُتے کم کرن والی سوانی افسر عمران خان دی حکومت بنن مگروں اپنے ملک دی خدمت کرن واپس پاکستان آ گئی۔ سوشل میڈیا اُتے وائرل ہوئی ویڈیو وچ سوانی نے دسیا کہ میرا ناں عصمت گل خٹک اے تے میری گنتی اوہناں کُجھ اوورسیز پاکستانیاں وچ ہوندی اے جو متحدہ عرب امارات وچ ٹاپ مینجمنٹ پوزیشن اُتے کم کردے سن۔پر میں اوتھوں استعفا دے دتا تے پاکستان واپس آ کے میں ڈائریکٹر جنرل دی حیثیت نال کنٹریکٹ پوسٹ اُتے نوکری کر رہی آں تے ہُن والی نوکری وچ مینوں متحدہ عرب امارات والی نوکری توں کئی گنا گھٹ تنخاہ مل رہی اے پر میں ایہ سبھ کُجھ صرف اپنے ملک پاکستان لئی کیتا اے۔ میں ایہ سبھ صرف ایس ارادے نال کیتا اے کہ میں اپنے ملک دی معیشت نوں بہتر کر سکاں تے اوہدی ترقی وچ اپنا کردار نبھا سکاں۔سوانی نے آکھیا کہ میں ساری دنیا ویکھ چُکی آں تے میں ایہ جانیا اے کہ ترقی یافتہ ملکاں دی ترقی دا راز اوہناں دے سسٹمز وچ اے۔ میرا 30ورھیاں دا تجربہ اے۔ سوانی دا کہنا سی کہ میری خاہش اے کہ مینوں کوئی اجیہا پلیٹ فارم ملے جیہدے ذریعے میں اپنے ملک دی ترقی وچ حصہ پا سکاں۔

 چیتے رہوے

کہ ایس توں پہلاں وی امریکا وچ مقیم پچھلے 10ورھیاں توں پاکستانی نژاد ڈاکٹر نے اپنی جائیداد ویچ کے پاکستان آن دا فیصلا کیتاسی۔ سوشل میڈیا اُتے وائرل ہوئی ویڈیو وچ ذکر کیتے گئے ڈاکٹر نے دسیا سی کہ میرا ناں ڈاکٹر عمران اے تے میں امریکا وچ پچھلے دس ورھیاں توں رہ رہیا واں تے ایتھے فزیشن دے طور اُتے کم کر رہیا واں۔ ڈاکٹر عمران نے دسیا سی کہ میں امریکا وچ نیونیٹولوجی دے اندر ریجنل ڈائریکٹر وی آں۔ میں پاکستان واپس آ رہیا واں۔ میں آکے اپنے ملک دی خدمت کراں گا ۔ڈاکٹر عمران دا کہنا سی کہ امریکا وچ میرا جھیل کنڈھے گھر اے۔ میری ایتھے جنی وی جائیداد اے میں اوہ ویچ کے سارے ڈالرز پاکستان لیاواں گا تے اپنے ملک نوں موجودہ مسائل توں رلکے کڈھاں گے۔ ڈاکٹر عمران نے آکھیا کہ میری گھر والی وی ایتھے فزیشن اے، میں اوہننوں وی نوکری توں استعفا دین دا آکھ دتا اے۔ تے میرا پورا خاندان ایتھے سبھ کُجھ چھڈ کے اپنے ملک دی خدمت کرن لئی واپس آ رہیااے تے مینوں آس اے کہ باقی اوورسیز پاکستانی وی اپنے ملک دی ترقی وچ اہم کردار نبھان گے۔کیونکہ رب نے سانوں ایہ موقع دتا اے تے سارے لوکاں نے رلکے ایس ملک نوں اک عظیم ملک بنانا اے بھاویں کوئی پاکستان وچ اے یاں پاکستان توں باہر ۔