نویں پاکستان وچ شہباز شریف نے گھر لبھنا شروع کر دتا ڈاکٹر طارق فضل چودھری تے دانیال چودھری دی گھر لبھن لئی ڈیوٹی لگ گئی

اسلام آباد(پاکستان پوائنٹ نیوز21۔اگست۔2018ء) نویں پاکستان وچ شہباز شریف نے گھر لبھنا شروع کر دتا۔قومی اخباردی اک رپورٹ مطابق پاکستان مسلم لیگ (ن) دے صدر و قومی اسمبلی وچ اپوزیشن لیڈر شہباز شریف نے اسلام آباد وچ گھر لبھنا شروع کر دتا اے۔

ایس سلسلے وچ ڈاکٹر طارق فضل چودھری تے دانیال چودھری دی ڈیوٹی لائی گئی اے کہ اوہ وفاقی راجدھانی دے پوش علاقے وچ کرائے اُتے گھر لبھن۔

رپورٹ وچ ہور دسیا گیا اے کہ شہباز شریف نے اپوزیشن لیڈر دا نوٹی فکیشن جاری ہوندے ای اسلام آباد وچ ڈیرے لان لئی گھر لبھنا شروع کر دتا اے۔

ڈاکٹر فضل چودھری تے بیرسٹر دانیال نے سیکٹرG/6ایمبیسی

روڈ اُتے تن وڈے گھر ویکھے نیں۔ عید مگروں شہباز شریف اسلام آباد آن گے تے گھر دا چناؤ کرن گے۔

رپورٹ مطابق قائد (ن) لیگ نواز شریف دی ہدایت اُتے پارٹی صدر شہباز شریف نے پارلیمنٹ دے اندر تے باہر احتجاج جاری رکھن دا فیصلا کیتا اے۔

ایس مقصد لئی اوہناں نوں بُہتا ویلا اسلام آباد وچ ای رہنا پئے گا۔ جیہدے لئی اوہناں نوں اک گھر تے دفتر چاہیدا ہوئے گا۔

گھر دے اک حصے وچ اپوزیشن لیڈر شہباز شریف دا دفتر ہوئے جدکہ سیاسی سرگرمیاں تے میٹینگز لئی وڈا ہال وی ہوئے گا۔ یاد رہوے کہ مسلم لیگ (ن) دے صدر شہباز شریف نوں قومی اسمبلی وچ اپوزیشن لیڈر متھیا گیا اے۔