میاں اسلم اقبال وزیر اعلا پنجاب لئی فیورٹ امیدوار بن گئے شاہ محمود قریشی دے مطالبے اُتے ضمنی الیکشن تیکر پنجاب دا عبوری وزیر اعلا لیان دی آس

اسلام آباد( پاکستان پوائنٹ نیوز31۔جولائی۔2018ء ) میاں اسلم اقبال وزیر اعلا پنجاب لئی فیورٹ امیدوار بن گئے، شاہ محمود قریشی دے مطالبے اُتے ضمنی انتخابات تیکر پنجاب دا عبوری وزیر اعلا لیان دی آس۔

تفصیل مطابق پنجاب دا تخت حاصل کرن لئی مسلم لیگ (ن) تے تحریک انصاف وچکار دوڑ جاری اے۔ پر پچھلے دیہاڑے تحریک انصاف نے نمبر گیم وچ مسلم لیگ (ن) نوں پچھانہ چھڈ دتا اے۔

25جولائی نوں ہون والے الیکشن دے سرکاری نتیجے مطابق پنجاب وچ مسلم لیگ (ن) نے 129جدکہ تحریک انصاف نے 123سیٹاں لیاں۔

پر ہن تحریک انصاف دا دعوا اے کہ مسلم لیگ (ق) تے آزاد امیدواراں دی حمایت دی وجہ توں اوہدیاں سیٹاں دی گنتی 168تیکر اپڑ گئی اے۔

دوجے پاسے پنجاب وچ فتح مگروں تحریک انصاف دے کئی رہنما پنجاب دی وزارت اعلا دے امیدوار

بن کے ساہمنے آئے نیں۔ ایہناں امیدواراں وچ شاہ محمود قریشی، فواد چودھری، علیم خان تے یاسمین راشد شامل نیں۔

شاہ محمود قریشی پنجاب اسمبلی دی سیٹ ہارن مگروں وی پنجاب دا وزیر اعلا بنن لئی ضد کر رہے نیں۔ شاہ محمود قریشی نے ایسے وجہ توں وزارت خارجا دا عہدہ لین توں وی معذرت کر لی اے۔

شاہ محمود قریشی نے منگ کیتی کہ پنجاب وچ اونی دیر تیکر عبوری وزیر اعلا لیاندا جائے۔ایس حوالے نال تحریک انصاف دے سربراہ عمران خان نے منگل دے دیہاڑے لاہور توں چُنے گئے رکن پنجاب اسمبلی میاں اسلم اقبال نال ون آن ون ملاقات کیتی۔

ملاقات دوران عمران خان نے میاں اسلم اقبال نال پنجاب وچ حکومت بنان لئی وچار وٹاندرا کیتا۔ ممکنہ پنجاب دے وزیر اعلا دے ناں دا اعلان کل تیکر کر دتا جائے گا۔