عمران خان بند گلی وچ پھس گئے، پی پی وفاق وچ ساڈے نال ٹرنا چاہندی اے تے فیصلا اوہنے کرنا اے: سعد رفیق

لاہور( پاکستان پوائنٹ نیوز26۔جولائی۔2018ء ) پاکستان مسلم لیگ (ن) دے مرکزی رہنما خواجا سعد رفیق نے آکھیا اے کہ تحریک انصاف دے چیئرمین عمران خان بند گلی وچ پھس گئے نیں، جے پیپلز پارٹی وفاق وچ ساڈے نال ٹُرنا چاہندی اے تے فیصلا اوہنے آپ کرنا اے، سانوں کوئی اعتراض نہیں، اسیں عمران خان نوں سمجھاندے ساں کہ تہاڈی واری آ گئی تے تہاڈا کیہ بنے گا، کیویں سرکار چلاؤ گے؟میڈیا نال گل بات کردے ہوئے خواجا سعد رفیق نے آکھیا کہ میرے پولنگ ایجنٹس نوں نتیجے نہیں دتے گئے، میرے 40پولنگ سٹیشناں اُتے نتیجیاں نوں روکیا گیا، رات تیکر مینوں 12ہزار ووٹاں توں جتوایا جا رہیا سی، ایہ اک انوکھا الیکشن

سی جیہدی تیاری دھرنا ون توں ای شروع کر دتی گئی سی۔

عمران خان نوں ووٹ پان والیاں نوں چھیتی پتا لگ جائے گا کہ اوہناں نے کیہ فیصلا کیتا، ویکھدے آں عمران خان کیویں سرکار چلاندے ۔

اوہناں نے آکھیا کہ عمران خان سیاسی تنہائی دا شکار نیں، اوہ ایسی تھاں پھس گئے نیں جتھوں واپسی دا راہ نہیں۔ اک سوال دے جواب وچ اوہناں دا کہنا سی کہ وفاق وچ ویکھاں گے کہ پیپلز پارٹی کس پاسے جاندی اے، جے اوہ ساڈے نال ٹُرنا چاہندی اے تے اوہدا فیصلا اوہنے آپ کرنا اے، سانوں کوئی اعتراض نہیں تے ایہ میرا ذاتی خیال اے۔

ایہدے مگروں پنجاب وچ اوہدے نال اتحاد بارے کوئی فیصلا کراں گے۔