اسلام آباد( پاکستان پوائنٹ نیوز19۔جولائی۔2018ء ) نجی ٹی وی چینل دے پروگرام وچ گل بات کردے ہوئے مشہور پرچا کار چودھری غلام حسین نے آکھیا کہ نواز شریف تے مریم نواز نوں جیل وچ قید ہوئے اجے اک ہفتہ ای ہویا اے کہ اوہناں نے جیل وچ بانگاں دینیاں شروع کر دتیاں نیں۔
اوہناں نے آکھیا کہ پہلے نواز شریف آکھدے سن کہ میں کسے کولوں نہیں ڈردا میں جیل جان لئی آ گیا واں، مینوں پھانسی توں وی ڈر نہیں لگدا، پر ہن اوہناں نے جیل سِر اُتے چُک لئی اے تے ایہ کہنا شروع کر دتا اے کہ مینوں ایتھوں کڈھوں۔
جے میں ایتھے رہ گیا تے ایتھوں میری لاش ای جائے گی۔ میری موت دے ذمے واری ایہو ہون گے۔
نواز شریف نے آکھیا کہ مینوں بہت تھکاوٹ محسوس ہو رہی اے، میری چھاتی اُتے مینوں بھار محسوس ہو رہیا اے، خدا لئی ڈاکٹراں نوں سدو تے اوہ ویکھن کہ میرا ہارٹ فیل ہون والا اے۔
اوہناں نے آکھیا کہ جے میں ایس طرحاں دے حالات وچ ایتھے رہیا تے مینوں کُجھ ہو جائے گا۔ جدوں ڈاکٹراں نوں سدیا گیا تے اوہناں نے نواز شریف دا چیک اپ کیتا تے اوہناں نوں آکھیا کہ تُسیں بالکل ٹھیک او، تہانوں کُجھ نہیں ہون والا۔
چودھری غلام حسین نے آکھیا کہ نواز شریف جیل وچ کدی رونا شروع کر دیندے نیں تے کدی گالھاں کڈھنیاں شروع کر دیندے نیں تے آکھدے نیں کہ ایہناں ساریاں نوں ویکھ لواں گے۔