کراچی وچ انتخابی مہم چلان توں ڈکیا جا رہیا اے: فاروق ستار سیاسی رہنماواں نوں عدالتوں سزا ہونا افسوسناک اے، نواز شریف نے 5سال حکومت وچ رہن مگروں نیب قوانین وچ ترمیم نہیں کیتی:میڈیا نال گل بات

کراچی( پاکستان پوائنٹ نیوز07۔جولائی۔2018ء ) ایم کیو ایم پاکستان دے رہنما ڈاکٹر فاروق ستار نے الزام لایا اے کہ ساڈے کارکناں دیاں گرفتاریاں دا سلسلا جاری اے، کارکناں دیاں گرفتاریاں الیکشن توں پہلاں دھاندلی اے، کراچی وچ انتخابی مہم تے جھنڈے لان توں ڈکیا (روکیا)جا رہیا اے، صرف پی ٹی آئی تے ہور جماعتاں دے بینرز لگے ہوئے نیں، سیاسی رہنماواں نوں عدالتوں سزا ہونا افسوسناک اے، نواز شریف نے 5سال حکومت وچ رہن مگروں نیب قوانین وچ ترمیم نہیں کیتی۔

کراچی وچ میڈیا نال گل بات کردے ہوئے ڈاکٹر فاروق ستار نے آکھیا کہ کراچی دے ووٹراں نوں اپنی رائے دے حق توں محروم کرن دی کوشش کیتی جا رہی اے۔

آدم شماری وچ وی کراچی تے حیدر آباد دے واسیاں نال فراڈ ہویا اے۔ اوہناں نے آکھیا کہ ساڈے کارکناں دیاں گرفتاریاں دا سلسلا جاری اے۔

کارکناں وچ ڈر تے

خوف دی فضا پیدا کر دتی گئی اے۔اوہناں دا کہنا سی کہ جیہدے اُتے تشویش اے، دسیا جائے چھاپے تے گرفتاریاں کیوں کیتیاں جا رہیاں نیں۔

ساڈے کارکن تے ووٹرکُھل کے انتخابی مہم وچ حصہ نہیں لے سکدے۔ کارکناں دیاں گرفتاریاں الیکشن توں پہلاں دھاندلی اے۔

ایم کیو ایم رہنما دا کہنا سی کہ کراچی وچ انتخابی مہم تے جھنڈے لان توں ڈکیا(روکیا) جا رہیا اے۔ شہر وچ صرف پی ٹی آئی تے ہور جماعتاں دے بینرز لگے ہوئے نیں۔

شہر دے کئی علاقیاں توں ایم کیو ایم دے بینرز ہٹا دتے گئے نیں، جیہدے توں انج لگدا اے کہ کُجھ جماعتاں منظور نظر نیں۔

نواز شریف دی سزا دے فیصلے اُتے ردعمل وچ فاروق ستار نے آکھیا کہ سیاسی رہنماواں نوں عدالتوں سزا ہونا افسوسناک اے۔اوہناں دا ہور کہنا سی کہ نواز شریف نے 5سال حکومت وچ رہن مگروں نیب قوانین وچ ترمیم نہیں کیتی۔