29ہزار غیر تصدیق شدہ ووٹ فیر شامل کر لے گئے،سپریم کورٹ وچ جاواں گے:ڈاکٹر یاسمین راشد

لاہور( پاکستان پوائنٹ نیوز26۔جون2018ء ) پاکستان تحریک انصاف دی این اے 125توں امیدوار ڈاکٹر یاسمین راشد نے آکھیا اے کہ 29ہزار غیر تصدیق شدہ ووٹ فیر شامل کردتے گئے نیں، غیر تصدیق شدہ ووٹاں خلاف سپریم کورٹ وچ جاواں گے،3گورنر ہاؤسز توں مسلم لیگ (ن) دی انتخابی مہم چلائی جا رہی اے، مریم نواز خلاف ساڈے اعتراض نہیں سُنے گئے، ہن فیر اپیل کراں گے۔

اوہناں نے اج پی ٹی آئی رہنما عندلیب عباسی نال پریس کانفرنس کردے ہوئے آکھیا کہ شہباز شریف نے آکھیا سی کہ صوبے وچ پانی دی فراہمی عام کراں گے۔

ہن اوہ کراچی وچ جاکے لوکاں نوں بے وقوف بنانا بند کرن۔ اوہناں نے آکھیا کہ 10سال شہباز شریف نے پنجاب اُتے حکومت کیتی۔

لوکاں دے نلکیاں وچ پانی نہیں آ رہیا۔ صاف پانی 400کروڑ دا پراجیکٹ اے پر لوکائی

نوں اک گُھٹ پانی نہیں ملیا۔ڈاکٹر یاسمین راشد نے آکھیا کہ صاف پانی کمپنی دے قمر اسلام نوں گرفتار کر لیا گیا اے۔

صاف پانی کمپنی دے 400کروڑ رُپئے کتھے گئے؟عمران خان جہاز اُتے جان تے تنقید کیتی جا ندی اے۔ شہباز شریف کراچی کیہڑے جہاز اُتے گئے؟اوہناں نے آکھیا کہ 3گورنر ہاؤسز توں مسلم لیگ (ن) دی انتخابی مہم چلائی جا رہی اے۔

شہباز شریف نوں 19گڈیاں دا پروٹوکول دتا گیا، لوکائی داپیسا ورتیا جا رہیا اے۔ ایس طرحاں سرکاری وسائل استعمال ہوئے تے پری پول دھاندلی ہوئے گی۔

اوہناں نے ہور آکھیاکہ مریم نواز دے کاغذات نامزدگی اُتے اعتراض کیتے۔ مریم نواز دی باہرلے ملک وی جائیداد اے۔ مریم نواز خلاف ساڈے اعتراض نہیں سُنے گئے۔ مریم نواز دے کاغذات نامزدگی اُتے فیر اپیل کراں گے۔