اسلام آباد( پاکستان پوائنٹ نیوز25۔جون2018ء ) سرکاری ٹیلی ویژن وی عمران خان نال اُچیچا (خصوصی) پروگرام کرن لگا۔ چیئرمین تحریک انصاف عمران خان پہلی وار ’پی ٹی وی‘ اُتے اُچیچا انٹرویو دین گے۔
تفصیل مطابق الیکشن نیڑے آؤندے ای سیاسی جماعتاں نے الیکشن دیاں تیاریاں شروع کر دتیاں نیں۔ ٹکٹاں دی ونڈ دے معاملات اُتے جاری رولے تے اک پاسے پر دوجے پاسے تحریک انصاف و مسلم لیگ (ن) سنے کئی جماعتاں ولوں الیکشن مہم جاری اے۔
تے تازہ آن والے سروے وی تحریک انصاف دے حق وچ فیصلا سُنا رہے نیں۔ ایس ساری صورتحال وچ تحریک انصاف دی حکومت دیاں نشانیاں نوں سمجھیا
جا رہیا اے۔
ایس حوالے نال کئی ملکی اداریاں نے وی پاکستان تحریک انصاف دی سیاسی بالادستی نوں قبول کر لیا اے۔ تازہ اطلاع مطابق سرکاری ٹیلی ویژن وی شاید عمران خان دی سیاسی طاقت نوں سمجھ گیا اے تے ایہو وجہ اے کہ پاکستان ٹیلی ویژن نے وی عمران خان نوں پہلی وار اُچیچے انٹرویو لئی سد لیا اے۔
پاکستان تحریک انصاف دے چیئرمین عمران خان پی ٹی وی دے پروگرام’ سچ تو یہ ہے‘ دے مجمان(میزبان) سید انوار الحسن نال الیکشن2018دے حوالے نال اُچیچی گل بات کرن گے۔
چیتے رہوے کہ ایس توں پہلاں عمران خان کدی وی سرکاری ٹی وی اُتے اُچیچی گل بات لئی نہیں آئے۔