دوجیاں دے اقامیاں اُتے رولا پان والی تحریک انصاف دے اپنے اقامے ساہمنے آن لگے

وہاڑی( پاکستان پوائنٹ نیوز19۔جون2018ء ) دوجیاں دے اقامیاں اُتے رولا پان والی تحریک انصاف دے اپنے اقامے ساہمنے آن لگے۔

پاکستان تحریک انصاف دی رہنما تے این اے 162توں قومی اسمبلی دی امیدوار عائشہ نذیر جٹ دا سعودی عرب دا اقامہ نکل آیا، اوہناں دے والد دے وی کاغذات نامزدگی رد ہو چکے نیں۔

تفصیل مطابق سال 2018پاکستانی پارلیمانی سیاست وچ اک اہم تے تاریخی سال اے۔پاکستانی تاریخ وچ پہلی وار 2جمہوری حکومتاں اپنے اپنے آئینی دور پورے کر کے چلیاں گئیاں نیں۔

2018الیکشن دا سال اے۔ ملکی اداریاں نے الیکشن دی تیاری شروع کیتی ہوئی اے جدکہ الیکشن کمیشن وچ کاغذات نامزدگی جمع کروان دا سلسلا پورا ہو گیا اے، جیہدے مگروں کاغذاں دی پُن چھان کیتی جا رہی اے۔

ایس موقعے تے وڈیاں وڈیاں وکٹاں اُڈن دی

امید اے، ایس حوالے نال آکھیا جا رہیا سی کہ بہت سارے وڈے وڈے سیاسی ناں ایس مرحلے اُتے مشکل وچ پھس سکدے نیں۔

ایس سلسلے وچ ریٹرننگ افسر عمران خان تے چودھری نثار نوں وی طلب کر چکے نیں۔ کاغذات نامزدگی دی پُن چھان دے مرحلے وچ سیاست داناں دے وڈے وڈے کارنامے ساہمنے آ رہے نیں۔

آرٹیکل62،63دی زد وچ آن توں بچن لئی سیاسی رہنماواں نوں کاغذات نامزدگی وچ اوہ شیواں وی ساہمنے لیانیاں پے رہیاں نیں جو اوہناں نے لُکائیاں ہوئیاں سن۔

ایہناں وچوں اک عائشہ نذیر جٹ وی نیں جیہناں نے اپنا اقامہ لُکایا ہویا سی پر ہن کاغذات نامزدگی وچ عائشہ نذیر جٹ دا اقامہ نکل آیا اے۔

عائشہ نذیر جٹ نوں این اے 162وہاڑی توں ٹکٹ جاری کیتا گیا سی۔ عائشہ نذیر جٹ دے والد دے وی کاغذات نامزدگی رد کیتے گئے نیں۔