اسلام آباد( پاکستان پوائنٹ نیوز19۔جون2018ء ) پاکستان مسلم لیگ (ن) نے سابق وزیر داخلا چودھری نثار علی خان دے مقابلے وچ قمر الاسلام تے سردار ممتاز نوں ٹکٹ جاری کر دتا اے۔
پارٹی وسیلیاں مطابق چودھری نثار علی خان دے مقابلے وچ امیدوار نامزد کرن دا فیصلا وچار وٹاندرے مگروں کیتا گیا اے۔
تفصیل مطابق پاناما کیس وچ نواز شریف دی نااہلی مگروں مسلم لیگ (ن) دی سیاست دا کالا دور شروع ہویا۔ مسلم لیگ (ن) دی ساکھ اودوں خطرے وچ پئی جدوں پارٹی دے قائد نواز شریف نے عدلیہ، نیب تے پاک فوج سنے ملکی اداریاں نوں تنقید دا نشانہ بنانا شروع کیتا۔
انج دے ماحول وچ پارٹی دے سینئر رہنماواں نے وی نواز شریف توں پچھانہ ہٹن دا فیصلا کیتا۔ ایس
ساری صورتحال وچ چودھری نثار علی خان پہلے تے چُپ رہے پر فیر اوہناں نے وی میڈیا کانفرنس، نیوز کانفرنس تے پرچا کاراں نال گل بات دوران پارٹی پالیسیاں دی مخالف کیتی۔
معاملا اودوں خراب ہویا جدوں نواز شریف تے چودھری نثار علی خان وچ دوریاں ودھیاں تے دوریاں دا ذمے وار مریم نواز دی پارٹی پالیسی تے نویں حکمت عملی نوں قرار دتا گیا۔
پچھلے دیہاڑے وی چکری وچ چودھری نثار علی خان نے جلسے نال خطاب کردے ہوئے آکھیا کہ میں چاہندا سی کہ اج (ن) لیگ تے نواز شریف دے حوالے نال کُھل کے گلاں کراں ۔
کیونکہ میڈیا ساہمنے بہت ساریاں گلاں نہیں کر سکدا۔ نواز شریف تے اوہناں دی دھی دا جوکردار رہیا اوہ ساہمنے لیانا چاہنا واں۔