پرچا کار ایس لئی تنقید کر رہے کہ اسیں اوہناں نوں عمرے لئی نہیں لے کے گئے:زلفی بخاری دا انوکھا جواب

اسلام آ باد( پاکستان پوائنٹ نیوز14۔جون2018ء ) پی ٹی آئی چیئرمین عمران خان بیوی نال عمرہ کرن سعودی عرب گئے، ایس موقعے تے اوہناں نال اوہنا ں دے قریبی دوست زلفی بخاری، عون چودھری، علیم خان تے اوہناں دی بیوی وی سی ۔ پی ٹی آئی چیئرمین عمران خان دے دوست زلفی بخاری دا ناں بلیک لسٹ وچ ہون دی وجہ توں اوہناں نوں جہاز وچ بیٹھن توں ڈک دتا گیا سی۔ پر بعدوں اوہناں نوں جان دی اجازت دے دتی گئی ۔ جیہدے مگروں کُجھ پرچا کاراں ولوں زلفی بخاری تے عمران خان نوں ڈاڈھی تنقید دا نشانہ بناندے ہوئے آکھیا گیا کہ عمران خان اُنج تے بہت اصول دیاں

گلاں کردے نیں پر اوہ اک اجیہے بندے نوں اپنے نال رکھدے نیں جو کہ نیب نوں مطلوب اے۔ پرچا کاراں نے عمران خان اُتے ایہ وی الزام لایا کہ عمران خان نے اپنا اثر و رسوخ استعمال کر کے زلفی بخاری دا ناں ای سی ایل توں کڈھوایا۔ ایس بارے زلفی بخاری نے اک ٹویٹ کیتا ، جیہدے وچ زلفی دا کہنا سی کہ رؤف کلاسرا ایس لئی میرے خلاف پروگرام کر رہیا اے ، کیونکہ اوہنوں نوں دُکھ اے کہ اسیں اوہنوں عمرے لئی نہیں لے کے گئے۔ جدکہ ارشد شریف ایس لئی ساڈے خلاف بول رہیا کیونکہ اسیں اوہناں نوں مالدیپ نہیں لے کے گئے۔