ساہیوال(پاکستان پوائنٹ نیوز17۔ستمبر2016ء) مسلم لیگ (ن) دے مرکزی رہنما حمزہ شہباز شریف نے آکھیا اے کہ لوکائی نے عمران خان دیاں احتساب ریلیاں نوں رَد کر دِتا اے، عمران خان دا راتوں رات وزیر اعظم بنن دا خاب ٹُٹ گیا۔
تفصیل دے مطابق ہفتے دے دیہاڑے ہڑپہ وچ میڈیا نال گل بات کردے ہوئے حمزہ شہباز شریف نے آکھیا کہ سپریم کورٹ نے دھاندلی دے دعوے رَد کر دِتے نیں، دھرنا سیاست کرن والے ہُن ذاتیات تیکر آ گئے نیں پر اسیں کدی اوہناں دی ذاتی زندگی اُتے گل نہیں کیتی۔
حمزہ
شہباز نے آکھیا کہ عمران خان صاحب تُسیں وی دھرنیاں تے گھر جان والی گل چھڈ دیو ۔ اوہناں دا کہنا سی کہ اک صاحب طاہر القادری ملک چھڈ کے چلے گئے نیں۔
اوہناں نے آکھیا کہ 2018 وچ بجلی دی لوڈشیدنگ ختم کر دِتی جائے گی تے ہُن کراچی دے حالات وی بہتر ہو گئے نیں۔ اوہناں نے آکھیا کہ عمران خان صاحب ہُن قوم دے فائدے دی سیاست کرن۔
اوہناں نے آکھیا کہ عمران خان زبردستی میدان سجاندے نیں پر اصل میدان 2018 وچ سجے گا تے عمران خان دا احتساب 2018 وچ خیبر پختونخوا توں ہووے گا۔