مریم نواز دا حلقہ این اے 120دا دورہ: نوجوان پڑھیار نوں آئسکریم کھوان دی پیشکش کر دتی

لاہور(پاکستان پوائنٹ نیوز22۔فروری2018ء) سابق وزیر اعظم نواز شریف دی دھی مریم نواز دا حلقہ این اے 120دے دورے دوران وکھرا ای انداز ویکھن نوں ملیا۔

حلقہ این اے 120دے دورے دوران مریم نواز نے نہ صرف کارکناں تے مقامی بندیاں دے مسئلے سُنے بلکہ مقامی سٹال توں حلوہ پوری تے چنے پٹھورے وی کھادے۔

سوشل میڈیا اُتے مریم نواز دے ایس عوامی انداز نوں ڈاڈھا پسند کیتا گیا۔ ایہو نہیں بلکہ مریم نواز نے علاقے وچ موجود میکڈونلڈ دا دورہ وی کیتا۔

سوشل میڈیا اُتے موجود اک ویڈیو وچ ویکھیا گیا کہ مریم نواز نے گڈی وچ

بیٹھے کُجھ پڑھیاراں نوں اپنے کول سدیا تے اوہناں توں پُچھیاکہ کیہ حال اے؟ کتھوں آئے او؟ جہدے اُتے پڑھیار نے جواب دتا کہ اسیں یونیورسٹی آف لاہور توں ایتھے آئسکریم کھان لئی آئے آں، جہدے اُتے مریم نواز نے آکھیا کہ چلو آئسکریم کھاؤ پیسے میں دینی آں۔

نوجوان پڑھیار نے مریم نواز دی ایس پیشکش اُتے آکھیا کہ تُسیں آؤ اسیں تہانوں کھواندے آں۔ مریم نواز نے آکھیا کہ نہیں میں کھوانی آں، میں وڈی آں ۔

مریم نواز دی ایہ ویڈیو سوشل میڈیا اُتے مشہور ہوئی اے جیہنوں لوکائی ولوں ڈاڈھا سلاہیا جا رہیا اے۔