ویلنگٹن(پاکستان پوائنٹ نیوز06۔جنوری2018ء) قومی ٹیم دے فاسٹ باؤلر حسن علی نے 20سال پرانے ملکی ریکارڈ اُتے اکھاں رکھ لئیاں نیں۔
دنیا دے نمبر ون، ون ڈے باؤلر نے نیوزی لینڈ خلاف پہلے ون ڈے وچ اپنے 10اوورز وچ 61سکور کرکے تن شکار کیتے، ایہ اوہناں دا لگاتار 13واں ون ڈے سی جہدے وچ اوہناں نے گھٹو گھٹ اک وکٹ لئی۔
پاکستان لئی ایہ ریکارڈ دنیا دے تیز ترین فاسٹ باؤلر شعیب اختر کول اے جہناں نے 1998-99وچ لگاتار 16میچاں وچ گھٹو گھٹ
اک شکار کیتاسی۔
سابق آل راؤنڈر عبدالرزاق ایس لسٹ وچ دوجے نمبر اُتے موجود نیں ،جہناں نے 2000وچ 15لگاتار مقابلیاں وچ گھٹو گھٹ اک وکٹ لئی سی۔
حسن علی جے نیوزی لینڈ خلاف باقی چار میچاں وچ وی گھٹو گھٹ اک وکٹ لے لیندے نیں تے فیر اوہ ملکی ریکارڈ اپنے ناں کر لین گے۔
لگاتار ون ڈے میچاں وچ وکٹاں لین دا عالمی ریکارڈ سابق آسٹریلوی سپیڈ سٹار بریٹ لی کول اے جہناں نے لگاتار 26مقابلیاں وچ گھٹو گھٹ اک شکار کیتا سی۔