فاٹا وچ کروڑاں رُپئے لے کے پولیٹیکل ایجنٹ دی تعیناتی کیتی جاندی اے: عمران خان

پشاور(پاکستان پوائنٹ نیوز06۔اکتوبر2017ء) پاکستان تحریک انصاف دے چیئرمین عمران خان دا کہنا اے کہ فاٹا وچ کروڑاں رُپئے لے کے پولیٹیکل ایجنٹ دی تعیناتی کیتی جاندی اے، پیسے دی وجہ توں ایہ علاقہ کرپشن دا اڈا بن گیا، فاٹا نوں چھیتی کے پی کے وچ ضم کیتا جائے تاں جے آؤندے الیکشن 2018وچ ایہ لوک حصہ لے سکن، محمود اچکزئی دا فاٹا نال کوئی تعلق نہیں۔

اوہناں نے اج پریس کانفرنس کردے ہوئے آکھیا کہ شمالی و جنوبی وزیرستان وچ لوکائی دے حالات خراب نیں۔ کاروبار تے مال ڈنگر تباہ ہو گیا اے۔

ایہ موقع اے کہ وفاقی حکومت بغیر کسے آپشن دے فاٹا نوں چھیتی کے پی کے وچ ضم کر دیوے۔ پر ایہ موقع ضائع کیتا جا رہیا اے۔

عمران خان دا کہنا سی کہ خیبر پختواہ دا بہترین لوکل سسٹم اے۔ ایسے کارن فاٹا لئی ایہ بہت اہم اے۔ اوہناں نے آکھیا کہ فاٹا سیکرٹریٹ کرپشن

دا اڈا اے۔

پولیٹیکل ایجنٹ دی تعیناتی لئی کروڑاں رُپئے لِتے جاندے نیں۔ ایس پیسے دی وجہ توں ایہ علاقہ کرپشن دا اڈا بن گیا اے۔

کرپشن کارن قبائلی علاقے پچھانہ رہ گئے نیں۔ اوہناں نے آکھیا کہ قبائلی علاقے دے لوکاں ولوں وفاقی حکومت توں مطالبہ کرنا واں کہ اوہناں نوں ایجنٹاں اُتے نہ چھڈو بلکہ اوہناں نوں پارلیمنٹ وچ آنا چاہیدا۔

اوہناں نے آکھیا کہ آپریشن ضرب عضب نال دہشت گردی ختم ہوئی۔ فاٹا نوں ضم نہ کر کے اسیں دہشت گردی نوں فیر موقع دیواں گے۔

عمران خان دا کہنا سی کہ محمود خان اچکزئی افغانستان دے مفاد دی گل کردے نیں اوہناں دا فاٹا نال کوئی تعلق نہیں۔

اوہناں نے آکھیا کہ نواز شریف منی لانڈرنگ دا پیسہ بچان لئی لڑ رہے نیں۔ نواز شریف نوں پتا اے کہ جے منی لانڈرنگ ثابت ہو گئی تے ساری جائیداد ضبط ہو جائے گی۔