گوجرانوالا(پاکستان پوائنٹ نیوز07۔ستمبر2017ء) ویکھیا جائے تے پاکستان وچ ٹیلنٹ دی کمی نہیں اے ۔صرف پاکستان وچ ای نہیں دنیا بھر وچ پاکستانی پڑھیاراں اپنے ٹیلنٹ نوں منواندے ہوئے ملک دا ناں اُچا کیتا۔
اجیہا کارنامہ گوجرانوالا دے پڑھیار مدثر نے انجام دتا اے ۔مدثر نے ٹریفک حادثیاں توں بچن تے موٹر سائیکل سواراں دی حفاظت نوں یقینی بنان لئی اک اجیہا ہیلمٹ تیار کر لیا اے جہنوں پا ئے بغیر موٹر سائیکل سٹارٹ نہیں ہوندی۔
پڑھیار دا کہنا اے کہ ایس ہیلمٹ دے بغیر نہ تے کوئی موٹر سائیکل چلا
سکدا اے تے نہ ای کوئی موٹر سائیکل چوری کر سکدا اے۔
مدثر نے دسیا کہ ایس ہیلمٹ وچ اک اجیہا سسٹم فٹ کیتا گیا اے کہ ہیلمٹ نوں لاہندے ای موٹر سائیکل نوں سگنل مل جاندا اے کہ بائیک چلان والے نے ہیلمٹ لاہ لیا اے جہدے مگروں موٹر سائیکل دا انجن بند ہو جاندا اے۔
مدثر نے دسیا کہ میں اپنی مدد آپ دے تحت ایہ سسٹم تیار کیتا اے تے ایس سسٹم دی تیاری وچ مینوں چار مہینے لگے نیں۔ مدثر دا کہنا سی کہ جے حکومت ساڈی سرپرستی کرے تے اسیں اجیہے کئی آلات بنا کے ملک و قوم دا ناں اُچا کر سکدے آں۔