مغربی ہواواں کارن سوموار توں ملک بھر وچ بارشاں دا سلسلا شروع ہون دی امید اے: محکمہ موسمیات

اسلام آباد(پاکستان پوائنٹ نیوز01۔اپریل2017ء) محکمہ موسمیات نے سوموار توں ملک دے اُتلے تے وچکارلے علاقیاں وچ مغربی ہواواں کارن بارش دی پیشنگوئی کردے ہوئے آکھیا اے کہ سوموار توں جمعرات دوران خیبر پختونخوا، فاٹا، گلگت بلتستان تے کشمیر جدکہ منگل تے بدھ نوں مالاکنڈ، ہزارہ ڈویژن تے کشمیر وچ بارش دا امکان اے۔

فور کاسٹنگ افسر حارث بن نسیم دے مطابق سوموار توں بدھ دے دوران راولپنڈی، سرگودھا، گوجرنوالا، لاہور، فیصل آبادڈویژن تے اسلام آباد وچ کیتے کیتے تیز ہواواں نال بارش دا امکان اے۔

ایس توں وکھ منگل دے دیہاڑے کوئٹہ، ژون، ڈی جی خان، ملتان تے ساہیوال ڈویژن اندر کُجھ تھاواں اُتے تیز ہواواں تے گرج چمک نال بارش ہو سکدی اے۔

منگل توں جمعرات دے

دوران راولپنڈی، اسلام آباد وچ تیز ہواواں نال بارش دا امکان اے۔ ایس دوران اُتلے پنجاب، اُتلے خیبر پختونخوا تے کشمیر دے علاقیاں وچ ژالا باری دا وی امکان اے۔

اوہناں نے دسیا کہ آن والے 48 گھنٹیاں دے دوران خیبر پختونخوا، فاٹا، اُتلے پنجاب (راولپنڈی، سرگودھا، فیصل آباد) گلگت بلتستان تے کشمیر وچ کیتے کیتے جدکہ کوئٹہ، ژوب، ڈیرا غازی خان، ملتان، ساہیوال وچ کُجھ تھاواں اُتے تیز ہواواں نال بارش دا امکان اے جدکہ ایس دوران ملک دے ہور علاقیاں وچ موسم خشک تے گرم رہوے گا۔

پچھلے 24گھنٹیاں دے دوران ملک دے کئی علاقیاں وچ موسم خشک تے گرم رہیا پر مالاکنڈ، ہزارہ، پشاور، راولپنڈی ڈویژن ، فاٹا، کشمیر تے گلگت بلتستان وچ تیز ہواواں نال ہلکی بارش ہوئی۔