گلبرگ دھماکے دی غلط خبر چلان اُتے پیمرا نے 31ٹی وی چینلاں نوں نوٹس جاری کر دِتے
لاہور(پاکستان پوائنٹ نیوز23۔فروری2017ء) لاہور اندر ڈیفنس مارکیٹ وچ دھماکے مگروں گلبرگ مین بلیوارڈ وچ دھماکے دیاں وی غیر تصدیق شدا اطلاعواں ملیاں جہنوں کئی ٹی وی چینلاں نے چلا وی دِتا، پر بعدوں سکیورٹی اداریاں، ریسکیو انچارج، پولیس سنے صوبائی وزیر قانون تے صوبائی وزیر صحت نے دھماکے دی خبر نوں رَد کردے ہوئے اوہنوں افواہ قرار دِتا تے شہریاں توں اپیل کیتی
کہ افواہواں اُتے کن نہ دھرن۔
دوجے پاسے گلبرگ دھماکے دی غلط خبر چلان اُتے پاکستان الیکٹرانک میڈیا ریگولیٹری اتھارٹی (پیمرا) نے 31ٹی وی چینلاں نوں نوٹس جاری کر دِتے نیں۔
مائیکرو بلاگنگ ویب سائٹ ٹویٹر اُتے اپنے پیغام وچ پیمرا نے دسیا کہ گلبرگ دھماکے دی غلط خبر چلان اُتے 31ٹی وی چینلاں نوں نوٹس جاری کردے ہوئے 7دِناں وچ جواب منگ لیا گیا اے۔