صدر مملکت ممنون حسین نا ایئر یونیورسٹی ٹی ”قومی معیشت نا شونداری ٹی تعلیم نا کڑد“ نا سرحال آ اڈ ہلوک آ مذاکراہ آن تران

اسلام آباد(پاکستان نیوز پوائنٹ 26جنوری2016ء) صدر مملکت ممنون حسین پارینے کہ انسانی وسیلہ غاتیا زرکاری پائیدار شونداری نا ضامن ءِ، تعلیم ہمو اسٹ انگا ذریعہ ءِ ہرا انسان نا آخبت ساڑی آن گچین جوڑ کننگ کیک۔

ہنداخاطران المی ءِ کہ معیشت تون اوار زند انا کیہی بشخ آتیٹی بدلینگوک آاقدار تون تفنگ کن طریقہ تعلیم اٹی ہم انقلاتی بدلی درستی راستی کرفنگے و تعلیم ءِ پٹ و پول اتون مربوط کرسا ورناتے کن علم انا درگہ غاتے ملنگے۔

صدر مملکت داہیت ءِ ایئر یونیورسٹی ٹی ”قومی معیشت نا شونداری ٹی تعلیم نا کڑد“ انا سرحال آ اڈ ہلوک آ مذاکراہ آن تران کرسا پارے۔

ہراٹی ایئر مارشل فاروق حنیف، وائس چانسلر ایئر یونیورسٹی ، ایئر وائس مارشل ریٹائرڈ فائز امیر و شرفمند آ مہمان تا اسہ بھلو کچ اس بشخ ہلک۔

صدر مملکت پارے کہ علم انا مون آدننگ کن مکالمہ نا آزادانہ فضاء قائم کننگ نا گرج ءِ انتئے کہ آجومکالمہ نا کمک اٹ ہی قوم تیا شونداری نا درگہ ملنگ انگ کیک۔

اوپارے کہ قومی وسیلہ غاتا کمتی نا سوب خواہش نا باوجود تعلیم آ زیات وسیلہ خڑچ مفننگ ءِ ولے حکومت تعلیمی بشخ آ غٹ دوئی وسیلہ غاتے

خڑچ کننگ ءِ تانکہ ملک اٹی افرادی واک انا تیاری آ زرکاری کرسا پائیدار شونداری نا بنداو ءِ تخنگ مرے۔

اوپارے کہ بدعنوان عنصر بدعنوانی نا برخلاف زیات شور کیرہ ہنداخاطران قوم بایدے دُن انگا بازی گرآتیان ہوشیار مرے۔

داخلقت پاکستان نا شونداری نا دشمن ءِ و پاکستان اٹی مروک آ پیشن نا زرکاری نا خائف ءِ۔ صدر مملکت پارے کہ پاک چین اقتصادی راہداری ڈیہہ نا غٹ آن بھلا ڈٹ ءِ ، بروک آ منہ سال اٹی پاکستان ڈیہہ نا غٹ آن اہم انگا ملک جوڑ مریک و پاکستان نا ناراض انگا سنگت حالیت آتے پہہ مرسا زوت نن تون برسا ملک، ننے داڑآن فائدہ ہرفنگ کن نن بایدے تینے تیار کین۔

صدر مملکت پارے کہ دنیا ٹی بھاز ترندی اٹ بدلی بننگ ءِ و دا بدلی تیان تینے ہم آہنگ کننگ و وطن عزیز کن ودی مروک آ تازہ گمان آتے کاریم اٹ اتنگ نا گرج ءِ۔

صدر مملکت ممنون حسین دا وخت آ ایئر یونیورسٹی ٹی کارپس ریسرچ سینٹر نا بناءِ ہم کرے۔ صدر مملکت پارے کہ ایئر یونیورسٹی قومی تعلیمی پٹ اٹی بے کچ چنکو وخت اسے ٹی نمان ہند دوئی کرینے ہراڑے پوسکن آ نسل ءِ پوسکن آ وڑوڈول آتیا جتا علوم و فنون نا تعلیم تننگ انگ ءِ۔