وزیراعظم محمد نواز شریف نا پاک چین اقتصادی راہداری نا ڈٹ جاٹ آتیا پیش رفت نا جاچ دیوان آن تران

اسلام آباد(پاکستان نیوز پوائنٹ 19دسمبر2016ء) وزیراعظم محمد نواز شریف ہندن انگا ہند آتیا صنعتی علاقہ غاتا اڈ تننگ نا پارت کرینے ہرااقتصادی وڑاٹ جوان مریر و اوفتے آن پاکستان و چین ہڑتوم آتے زیات آن زیات معاشی فائدہ دوئی مرے۔

دوشنبے آ وزیراعظم ہاؤس اٹی پاک چین اقتصادی راہداری نا رداٹ کیہی ڈٹ جاٹ آتیا پیش رفت نا جاچ دیوان نا کماشی ءِ کرسا وزیراعظم دا ہند آتا اقتصادی موزونیت و فائدہ غاتا بارواٹی چینی حکومت نا تجویز پیش کننگ کن اسہ کمیٹی اس جوڑ کننگ نا ہم پارت کرے۔

اوپارے کہ چین اہم موڑ آ اقتصادی بحالی کن پاکستان نا بھاز زیات کمک ءِ کرے ہراڑآ پاکستان نا حکومت و الس چینی سروک و الس نا منت وار ءِ۔

وزیراعظم پارے کہ چین و پاکستان تینا مریس المیعاد سٹریٹجک رابطہ غاتے سوگوو پائیدار اقتصادی شریداری ٹی شاغانے ہراڑآن ہڑتوم آ ملک آتے بھاز فائدہ مریک۔

دیوان نا وخت توانائیم، ٹرانسپورٹ ، انفراسٹرکچر و صنعتی ڈٹ آتے کن تخوک آ ہدف نا جاچ ءِ ہلنگا وخت اس کہ گوادر اٹی شونداری و راجی و اقتصادی شرحالی نا ڈٹ آتیا خصوصی توجوہ تننگا۔

وزیراعظم ءِ چین وپاکستان نا اسیجائی کمکاری کمیٹی نا بروک آ دیوان نا عبوری ایجنڈا ٹک آتا بارواٹی ہم معلومدار کننگا۔

سی پیک اٹی ڈٹ انا اوار مننگ نا وڑوڈول

نا وضاحت کرسا دیوان ءِ پاننگاکہ اسیجائی کمکاری کمیٹی (جے سی سی ) نا گڈیکو منظوری آن مست تعلقدار ورکنگ رڑانا منظوری مریک۔

وزیراعظم پارت کرے کہ کراچی سرکلر ریلوے و کیٹی بندر پروجیکٹ ءِ سی پیک اٹی اوار کننگ کن بروک آجی سی سی ٹی سجفنگ کن بایدے پیش کننگے دُن کہ سندھ حکومت معلومدار کرینے۔

اوپارے کہ چینی حکومت ءِ داڈٹ جاٹ آتا بھاز زیات اقتصادی موزونیت نا بارواٹی بایدے معلومدار کروئی مرے تانکہ اودے سی پیک اٹی اوار کننگے۔

اووزیر ڈٹ بندی و شونداری احسن اقبال ءِ پارت کرے کہ او غٹ وزیراعلیٰ تتون اوفتا صوبہ غاتیٹی صنعتی زونز نا ہند آتے گڈیکو دروشم تننگ کن صلابت کے۔

دیوان ءِ کولا، دیر ، تہو ، دے انا روشنائی آن توانائی تون اوار سی پیک نا رداٹ توانائی ڈٹ جاٹ و ٹرانسمیشن لین تا بارواٹی ہم معلومدار کننگا۔

پاننگاکہ سڑک، ریل، تہوبازی و ڈیٹا کنکٹویٹی تون اوار بنداوی ڈھانچہ نا ڈٹ آتیا ترندی اٹ عمل کننگ انگ ءِ۔ دیوان اٹی بنجائی وزیر خزانہ سینیٹر اسحاق ڈار، وزیرڈٹ بندی و شونداری احسن اقبال، وزیر دیر و بجلی خواجہ محمد آصف، وزیر بندرگاہیں و جہازرانی میر حاصل خان بزنجو ، وزیراعلیٰ پنجاب شہباز شریف ، وزیراعظم نا خصوصی کمکار طارق فاطمی و ایلو سینئر کمامدارآک بشخ ہلکر۔