ملک اٹی وسیع تر اقتصادی وارخواہی ولائخی تیان پبی فائدہ ہرفنگ کن بجلی نا کاختی نا چٹفنگ المی ءِ، ساڑی حکومت نا کوشست آک صرف 2018 ء اسکان ملک آن بجلی نا کاختی نا مر کننگ اسکان محدود افس، حکومت نا مریس وختی ڈٹ آتیٹی 2022ء اسکان 30 ہزار میگاواٹ آن زیات بجلی ودی کننگ اوارءِ وزیراعظم محمد نواز شریف نا توانائی نابابت کیہی ڈٹ آتیا پیش رفت نا جاچ دیوان آن تران

اسلام آباد(پاکستان نیوز پوائنٹ 19دسمبر2016ء) وزیراعظم محمد نواز شریف پارینے کہ ملک اٹی وسیع تر اقتصادی وارخواہی و لائخی تیان پبی فائدہ ہرفنگ کن بجلی نا کاختی نا چٹفنگ المی ءِ۔

اوداہیت ءِ دوشنبے آ ایوان وزیراعظم اٹی توانائی نا بابت کیہی ڈٹ آتیا پیش رفت نا جاچ دیوان آن تران کرسا پارے۔ وزیراعظم پارے کہ ساڑی حکومت نا کوشست آک صرف 2018 ء اسکان ملک آن بجلی نا کاختی ءِ مر کننگ اسکان محدود اف بلکن حکومت نا مریس وختی ڈٹ آتیٹی 2022ء اسکان 30 ہزار میگاواٹ آن زیات بجلی ودی کننگ اوار ءِ۔

اوپارے کہ پاکستان نا تاریخ اٹی بجلی نا پیداوار کن داخہ بھلو زرکاری اس مہالو وخت اس ہم متنے ہرانا مسخت تینا گرج آتے پورو کننگ و آخبت نا گرج آتے مون آ تخنگ نا ءِ۔

وزیراعظم داہیت آ است ہسونی نا درشانی ءِ کرے کہ بدقسمتی اٹ گدرینگوک آ 15سال انا وخت بروک آ حکومت آک دا ویل ءِ نظرانداز کریر۔

اوپارے کہ بجلی نا پیداوار اٹی ودکی آن اقتصادی شونداری ٹی ودکی مریک و صنعتی سرجزآک زور ہلیرہ۔ اوپارے کہ او ڈٹ آتا بروخت پوروی ءِ باوری جوڑ کننگ کن مچ آ ملک اٹی جاری بجلی نا ڈٹ جاٹ

آتیا پیش رفت نا جندی وڑاٹ چاری گری ءِ کننگ ءِ۔

اوپارے کہ ننا توانائی نا ڈٹ ننا اقتصادی وژن نا محور ءِ و داڑآ عملدرآمد و توانائی نا ڈٹ آتا پوروی ٹی سستی ءِ اسُل سگنگ پننگک۔

دیوان ءِ پاکستان اٹی بجلی نا جاری ڈٹ جاٹ آتا گنجائش و مدت نا بارواٹی سرجم بریفنگ تننگا۔ دیوان ءِ پاننگا کہ 7 آن 8 ہزار میگاواٹ نا متوقع شارٹ فال نا مقابلہ ٹی مارچ 2018ء اسکان تقریباََ 10996میگاواٹ بجلی نیشنل گریڈ اٹی اوار مریک۔

نیشنل گریڈ اٹی بجلی نا نمان ودکی ٹی ملک آن لوڈشیڈنگ چٹک۔ دیوان ءِ پاننگاکہ ملک انا غٹ بشخ آتیٹی ٹرانسمیشن سسٹم ءِ گچین جوڑ کننگ کن ہم کاریم جاری ءِ ہرانا وزارت دیر و بجلی بغور چاری گری ءِ کننگ ءِ۔

ودکی گنجائش کن نظام ءِ سوگوی تننگ نا عمل 2017ء نا ایسر اسکان پور و مریک ہراڑآن ملک انا 90 درسد ٹرانسمیشن سسٹم اڑاند آتیان پاک مریک۔

دیوان اٹی وزیر خزانہ اسحاق ڈار، وزیر ڈٹ بندی و شونداری احسن اقبال ، وزیر دیر و بجلی خواجہ محمد آصف ، وزیر اعلیٰ پنجاب محمد شہباز شریف، وزیراعظم نا خصوصی کمکار طارق فاطمی و ایلو سینئر کمامدارآک ساڑی ئسر۔