پاکستان ڈیہہ نا شونہالی کن سارک انا مسخت آتا دوئی آ یخین تخک وزیراعظم محمدنواز شریف نا سارک انا 31می سال دے ، 32می سارک چارٹرڈے نا وخت آ کلہو
اسلام آباد(پاکستان نیوز پوائنٹ 8دسمبر2016ء) وزیراعظم محمد نواز شریف پارینے کہ پاکستان ڈیہہ نا شونہالی کن سویلی ایشیائی تنظیم علاقائی کمکار (سارک) انا مسخت آتا دوئی آ یخین تخک۔
وزیراعظم داخیال آتا درشانیءِ سارک انا 31می سال دے و 32می سارک چارٹرڈے نا وخت آ تینا کلہو اٹی کرے۔ اوپارے کہ داوخت آ او سارک انا رداٹ اسیجائی مسخت آتا دوئی کن اواری اٹ چلینگ انگ و سارک انا مسخت آتا دوئی کن پاکستان نا عزم انا اعادہ کیک۔
اوپارے کہ پاکستان سارک انا بانی باسک مننگ نا حیثیت آن سارک چارٹر نا اصول آتیا کاربند ءِ و ہنداجوزہ نا رداٹ پاکستان 19می سارک سروک کانفرنس نا میزبانی نا تیاری کرے ولے کانفرنس نا التواء آن علاقائی کمکاری، شونداری و شونہالی نا گمانی نا بابت الس اسہ وار ولدا محروم مسنے۔
اوسارک انا 31می سال دے و سارک چارٹرڈے
نا 32می سال دے آ سارک انا باسک ملک آتا الس ءِ مبارکبادی تس۔اوپارے کہ اینو نا دے نن دا جوزہ نا درشان نا وڑاٹ اڈ ایتنہ ہرانا پت ءِ الس ننا راہشون آتیا کرے و اوسارک چارٹرءِ ایسری اسکان سرکننگ کن کاریم کریر و ہنداٹی گڈ اٹی سارک انا اڈتننگ عمل اٹی بس۔
وزیراعظم پارے کہ اینو آن مسہ عشرہ آن زیات وخت آن مست او اسیجائی علاقائی کوشست آتے کننگ نا عزم انا درشانی ءِ کرے و تینا الس نا گچین زند انا معیار کن کوشست آتے ترند کرے ولے وزیراعظم داہیت آ افسوزنا درشانی ءِ کرے کہ سارک انا مسخت آتے دوئی کننگ اٹی او سرسہبی دوئی متویسس ہرانا تصور کننگاسس و تینا الس نا شونداری و شونہالی نا مسخت دوئی کننگ کن ہرا وعدہ کننگاسس او پورو متوس۔
وزیراعظم سویلی ایشیانا الس نا امن، شونہالی و ہم آہنگی کن نیک است خواہی تا درشانی ءِ کرے۔