اسلام آباد(پاکستان نیوز پوائنٹ 14نومبر2016ء) جمعیت علمائے اسلام (ف) نا سروک مولانا فضل الرحمان پارینے کہ جہانی برادری بھارت نا ریاستی دہشت گردی نا نوٹس ءِ ہلے۔
اوغانستان نا حکومت تون اواری اٹ اوغان مہاجرآتا باعزت وطن آ پدی ہِننگ ءِ باوری جوڑ کروئی مریک۔ اوغان زرکار و تعلیم حاصل کروک آ اوغان مہاجر آتا چناتے ویزہ نا آسراتی تننگے۔
سے شنبے آ وزارت سیفران اٹی اوغان مہاجر آتیان بابت اڈ ہلوک آ دودآن گڈ ہندا بلاک نا پیشن آ میڈیا تون ہیت وگپ کرسا اوپارے کہ بھارت نا کنڈآن بارڈر آ سیکورٹی فورس آتا ورناتا کہینگ آ قوم سراپا احتجاج ءِ و جہانی برادری آن خواست کیک کہ او بھارت نا ریاستی دہشت گردی نا نوٹس ءِ ہلے۔
بھارت نا کنڈآن وار وار سیمی
خلاف ورزی کننگ انگ ءِ۔ داڑآ جہانی برادری انت اکن خاموش ءِ۔ اوپارے کہ اوغان مہاجر آتا وطن آ پدی ہِننگ نا بابت غٹ سیاسی جماعت آک متفق ءُ و خوارہ کہ اوغانستان نا حکومت تون اواری اٹ اوغان مہاجر آتے رضاکارانہ وڑاٹ وطن آ پدی ہِننگ ءِ باوری جوڑ کننگے۔
اوپارے کہ پاکستان مسکوہی 37سال آن اوغان مہاجر آتا میزبانی ءِ کننگ ءِ ۔ نن خواپنہ کہ اشتافی ٹی اوغان مہاجر آتا وطن آ پدی ہِننگ آ ننا میزبانی آ داغ اس لگے۔
اوپارے کہ وزارت سفیران اوغان زرکار و رہینگوک آ اوغان مہاجر آتا چناتے تعلیم پورو کننگ اسکان ویزہ نا آسراتی فراوان کے۔
داکان مست مولانا فضل الرحمان وزارت سیفران نا کنڈآن اوغان مہاجر آتیان بابت سفارش آتیا پت انا درشانی ءِ کرے۔