پیمرا نا غیر کانودی بھارتی سٹیلائٹ ڈش و سٹیلائٹ ٹی وی چینلز آتیا غیر کانودی بھارتی مواد نشان تننگ نا برخلاف کارروائی نا فیصلہ چیئرمین پیمرا ابصار عالم نا پریس کانفرنس

اسلام آباد(پاکستان نیوز پوائنٹ 31اگست 2016ء) پاکستان الیکٹرانک میڈیا ریگولیٹری اتھارٹی (پیمرا) نا چیئرمین ابصار عالم پارینے کہ پیمرا غیر کانودی بھارتی سٹیلائٹ ڈش و سٹیلائٹ ٹی وی چینلز آتیا غیر کانودی بھارتی مواد نشان تننگ نا برخلاف کارروائی نا فیصلہ کرینے۔

چارشنبے آ داڑے پیمرا ہیڈ کوارٹرز اٹی اسہ پریس کانفرنس اسے آن تران کرسا اوپارے کہ کیبل آپریٹر ز و ٹی وی چینلز آتا انتظامیہ غاتون پارینے کہ مشرف دور اٹی اختیار کروک رولز آ رضاکارانہ وڑاٹ عمل کیر۔

ایلو دروشم اٹی 15اکتوبر آن اوفتا برخلاف کارروائی کننگک۔ اوپارے کہ مارننگ شوز انا پروگرام آتیٹی ضابطہ اخلاق نا خلاف ورزی کروک آ چینل آتا برخلاف ہم کارروائی مریک۔

اسہ سوج اسے آ اوپارے کہ قواعد نا خلاف ورزی کروک آ چینل و کیبل آپریٹرز آتے جرمانہ و لیسنس نا معطلی نا سزا مننگ کیک۔

ابصار عالم لس خلقت آتون پارے کہ او غیر کانودی بھارتی ڈش آتا

کاریم اٹ اتنگ ءِ بند کیر انتئے کہ دا غیر کانودی و قومی مفاد نا برخلاف ءُ۔

اسہ سوج اسے آ اوپارے کہ سٹریٹجی نا رداٹ پی ٹی اے، انٹیلی جنس ادارہ و پولیس نا کمک اٹ دا غیر کانودی عمل نا برخلاف کارروائی مریک۔

اوپارے کہ بھارتی ڈش آتیا پابندی کن ایف آئی اے ءِ ہم پت اٹی ہلنگک۔ اوپارے کہ پیمرا اکتوبر اسکان تینا ڈی ٹی ایچ سسٹم ءِ درستی راستی کرفک۔

چیئرمین پیمرا پارے کہ پیمرا صوبہ غاتا وزیراعلیٰ و ایف بی آر ءِ کمکاری کن چھٹی اس نوشتہ کیک۔ اسہ سوج اسے نا ورندی ٹی اوپارے کہ گڑاس اینکر پرسنز حکومت نا برخلاف بھاز انگا ٹاک شوز کریر ولے او مقبوضہ کشمیر اٹی انسانی حق انا بگڑینگوک آ حالیت و کشمیری تا بے کچ سفاکانہ ظلم ءِ تالان کننگ کن ہچ ءُ پروگرام اس کتوس۔

اوپارے کہ ٹی وی چینلز آتے مقبوضہ کشمیر اٹی ظلم انا حالیت آتے تالان کننگ کن ہم پروگرام کروئی مرے ہراڑے بھارتی فوج کشمیری تیا پدریسہ ظلم کننگ ءِ۔