اسلام آباد(پاکستان نیوز پوائنٹ 26اگست 2016ء) بنجائی وزیر اطلاعات و نشریات سینیٹر پرویز رشید پارینے کہ جمہوری و کانودی کسر اس اختیار کننگ آن ہی پاکستان ءِ سوگو جوڑ کننگ مریک، وونٹ انا کمک اٹ احتساب نا عمل سیاسی جماعت آتے کن سبخ اسے، جذباتی نعرہ غاتا سیاست نزور مس و الس نا زند ءِ گچین جوڑ کننگ نا کنڈا توجوہ تننگ انگ ءِ ، اگہ الس ءِ است جمی مس کہ دا جماعت جوان کاریم کرینے تو او بروک آ گچین کاری تیٹی اودے دُوارہ وونٹ ایترہ، الس است جم مریک تو پسند و ناپسند نا معیار بدلینگک۔
داخیال آتا درشانی ءِ بنجائی وزیر اطلاعات و نشریات سینیٹر پرویز رشید”اے پی پی“ تون اسہ خصوصی انٹرویو اسے ٹی کرے۔
اوپارے کہ ساڑی آ سیاسی حالیت ، وونٹ انا کمک اٹ سیاسی حکومت آتا اڈتننگ و پنچ سال انا مدت پورو مننگ آن جمہوریت نا روتہ غاک پین سوگو مننگ ءُ و غیر جمہوری حکومت و مارشل لاء نا سوب آن ہراالسی ویل آتا کنڈا پبی حکومتی توجوہ تننگ تویسس اوفتا اثرآک ہم زائل مننگ ءُ۔
دا بدلی داسا نظر بننگ نا بناء مسنے۔ بنجائی وزیر اطلاعات پارے کہ آمریت نا سریس دور اٹی گڑاس ادارہ غاتا تینا حد آن تجاوز ہم ویل ودی کریر۔
داسا او ادارہ غاک فکری وڑاٹ داہیت ءِ امنا کرینو کہ ادارہ غاتا سوگوی کن دنگ و قیود نا تعین آن بیدس چارہ کار اف۔
ادارہ غاک اسہ دے اٹی پدی تینا حد آتیان بننگ کپسہ۔ دا تدریجی عمل نا اسہ بشخ اس مریک ، انجکشن یا وٹامز اٹ نن انا نن فعال کننگ مفسہ، جمہوری و کانودی کسر اختیار کننگ آن ہی پاکستا ن ءِ سوگو کننگ مریک۔
وزیر اطلاعات و نشریات پرویز رشید پار ے کہ میثاق جمہوریت آ بنجانا اِرا بھلو جماعت پیپلز پارٹی
و مسلم لیگ (ن) دستخط کریسر وخت اس کہ ایلو جماعت آک ہم اوڑآ تقریباََ اتفاق کریسر۔
دا اِرا جماعت آتا ٹکراؤ نا سوب 1999ء آن مست 58 ٹوبی نا اطلاق و فوجی حکومت نا کسر ہموار مس ولے داسا اوفتے آن اسہ پارٹی نا حکومت پنچ سال ءِ پورو کرے وخت اس کہ ایلو پورو کننگ اٹی ءِ۔
ایلو کنڈ حالیت دادے کہ اسہ سیاسی سروک اس، ہرا دا المیہ غاتیان گدرینگ تنے ، او سیاسی نظام ءِ مہندم کننگ خواہک۔
اوپارے کہ پاکستان دا المیہ نا گواچی 2008ء آن 2013ء اسکان مس و داسا 2018 ء نا کنڈا سفر جاری ءِ و گچین آثار نظر بننگ ءِ۔
اوپارے کہ 2013ء نا گچین کاری تیٹی الس مسلم لیگ (ن) ءِ وونٹ تس اگہ اوفتے اطمینان مس کہ داجماعت جوان کاریم کرینے تو او اودے دُوارہ وونٹ ایترہ۔
اوپارے کہ ملک اٹی میگاپروجیکٹ شروع مسنے ولے داسکان اوفتا نتیجہ مون آ بتنے، گچین کاری مہم اٹی داڈٹ آتا ذکر تو مریک، ہنداخاطران دا مسلم لیگ (ن) نا امتحان مریک ، الس است جم مریک تو پسند و ناپسند نا معیار بدلینگک۔
پوسکنا سیاسی مہم اٹی میڈیا نا کڑد ہم اہم مریک۔ اوپارے کہ اولیکو وار وونٹ انا کمک اٹ پنچ سالہ حکومت پورو مس و داسا 2018 ء ٹی پوسکنا حکومت بریک و ہنداوڑ دہ سال اٹی وونٹ انا تقدس ءِ تسلیم کننگانے۔
وزیر اطلاعات پرویز رشید پارے کہ داکان مست ہم بنجا و صوبہ غاتیٹی کیہی سیاسی جماعت آتا حکومت مسکہ ولے داسا مسکوہی نا مقابلہ ٹی پت اتون اواری اٹ کاریم مننگ ءِ۔
نت نئے آزموندہ غاتا برعکس داسا پاکستان اٹی آزموندہ نسخہ غاتے تینا کننگ آن السی ویل آتے ایسر کننگ کن اتفاق رائے آ ہراگرج انا احساس ودی مسنے اودے غٹ ادارہ و سیاسی جماعت آک قبول کننگ نا کنڈ گام بٹینو۔