سلاہکار خارجہ سرتاج عزیز نا چین، فرانس، روس ، برطانیہ ، امریکہ و یورپین یونین نا سفیر آتے مقبوضہ کشمیر اٹی بھارتی فورسز آتا انسانی حق انا خلاف ورزی تیا بریفنگ

اسلام آباد(پاکستان نیوز پوائنٹ 26اگست 2016ء) سلاہکار خارجہ سرتاج عزیز مقبوضہ کشمیر اٹی بے گناہ کشمیری تیا بھارتی فورسز آتا وحشیانہ بیدادی آ گڑتی نا درشانی ءِ کرسا پارے کہ بھارت نا جارحانہ گام گیج غیور کشمیری الس ءِ حق خودارادیت کن اوفتا روا جہد آن توننگ کپسہ۔

کشمیر آن بابت مذاکرات کن پاکستانی سلاہ نا ورندی ٹی بھارت نا انکار افسوز ناک ءِ۔ بین الاقوامی برادری خاص کر سلامتی کونسل نا پنچ آخبتی باسک و یورپین یونین نا انسانی حق و بین الاقوامی انسانی کانود نا اصول آتیا عملدرآمد کرفنگ اٹی اہم کڑد اسے، ہنداخاطران او اقوام متحدہ نا سلامتی کونسل نا قرارداد آتا رداٹ کشمیری الس تون کروک آ وعدہ غاتا پاسداری ءِ کے۔

داہیت آتے او پنچ شنبے آ داڑے سلامتی کونسل نا پنچ آخبتی باسک چین، فرانس ، روس، برطانیہ ، امریکہ و یورپین یونین نا پاکستان اٹی تعینات سفیر آتے مقبوضہ کشمیر اٹی مشیری الس

آ بھارتی فورسز آتا وحشیانہ بیدادی و انسانی حق انا خلاف ورزی تیا بریفنگ ترسا پارے۔

دفتر خارجہ نا ترجمان نا رداٹ سلاہکار خارجہ مقبوضہ کشمیر اٹی قابض بھارتی فورسز آتا کنڈآن کشمیری الس آ ظلم و اوفتا برخلاف واک انا وحشیانہ کاریم اٹ اتنگ نا نتیجہ ٹی 80 بے گناہ کشمیری تا تپاخت آ گڑتی نا درشانی ءِ کرے۔

سرتاج عزیز پارے کہ بھارت نا جارحانہ گام گیج آک غیور کشمیری الس ءِ حق خودارادیت نا دوئی کن اوفتا روا جہد آن توننگ کپسہ۔

اوکشمیر آن بابت مذاکرات کن پاکستانی سلاہ نا ورندی ٹی بھارت نا انکار آ ہم افسوز نا درشانی ءِ کرے۔ دا چرجوئی ٹی او سفیر آتے سیکرٹری خارجہ اعزاز احمد چوہدری او اونا بھارتی ہم منصب نا نیام اٹ چھٹی تا درشانی آن معلومدار کرے۔

سلاہکار خارجہ پارے کہ پاکستان اقوام متحدہ نا سیکرٹری جنرل نا کنڈآن کشمیر نا تنازعہ نا ایسری کن کمکار نا پیش کش نا خیرمقدم ءِ کیک۔